ڏوڪري ۾ عورت جو مڙس ۽ امڙ سميت مائٽن خلاف احتجاج

مائٽ ملڪيت ڦٻائڻ لاءِ ڌمڪيون ڏئي رهيا آهن: خورشيد خاتون ڀنڊ

ڏوڪري (اطهر ميمڻ) ڏوڪريءَ ۾ مسمات خورشيد خاتون پنهنجي مڙس گلزار ڀنڊ ۽ ماءُ اميران خاتون سان گڏ پريس ڪانفرنس ڪندي الزام مڙهيو آهي ته سندن مائٽ ملڪيت ڦٻائڻ لاءِ مارڻ جون ڌمڪيون ڏئي رهيا آهن. ڏوڪري پريس ڪلب ۾ هڪ پريس ڪانفرنس ڪندي متاثر عورت خورشيد خاتون چيو ته هن پنهنجي مڪمل رضا خوشي ۽ ماءُ جي مرضيءَ سان گلزار ڀنڊ سان نڪاح ڪيو آهي، پر سندن مائٽ جن سان سندن ويجهو رشتو به ناهي سندن شادي ڪرڻ تان ڪاوڙيل آهن ۽ کين ڌمڪيون ڏئي رهيا آهن..نهن ٻڌايو ته شاهد علي ڀنڊ، حبدار علي ڀنڊ، صاحب علي ۽ جاويد ڀنڊ سندن جان جا دشمن بڻيل آهن ۽ گهر ۾ گهڙي ٽوڙ ڦوڙ پڻ ڪئي آهي، جڏهن ته کين قتل جون ڌمڪيون به ڏئي رهيا آهن.خورشيد خاتون جو چوڻ هو ته ڪجهه مهينا اڳ سندس پهريون مڙس وفات ڪري ويو هو ۽ ان کان اڳ سندس پيءُ به لاڏاڻو ڪري چڪو آهي، جنهن بعد سندن ڪجهه عزيز ملڪيت تي قبضي جي نيت سان مٿس دٻاءُ وجهي رهيا آهن ته هو گلزار ڀنڊ سان ڪيل نڪاح ختم ڪري.پريس ڪانفرنس دوران هنن چيو ته ڄاڻايل ماڻهن مان کين سنگين جان جو خطرو آهي، ان ڪري وس وارن اختيارين کان مطالبو ٿا ڪريون ته سندن بيان جو نوٽيس وٺي کين تحفظ فراهم ڪيو وڃي.