ٿرپارڪر ۾ سُڪار فائونڊيشن ۽ گرو گرين نيٽ ورڪ پاران عوامي گڏجاڻي منعقد

مٺي (رپورٽر )سُڪار فائونڊيشن ۽ گرو گرين نيٽ ورڪ پاران انڊس ڪنسورشيم جي سهڪار سان مٺي، ٿرپارڪر ۾ “پبلڪ فورم 2025: سولر برابري، فاسل ٻارڻ کان نجات، ۽ پائيدار بحالي” جي عنوان سان هڪ عوامي گڏجاڻي منعقد ڪئي وئي، جنهن ۾ سماجي ڪارڪنن، سياسي اڳواڻن، صحافين ۽ شهرين وڏي انگ ۾ شرڪت ڪئي. فورم دوران شرڪت ڪندڙن توانائي جي برابري، موسمياتي انصاف ۽ فاسل ٻارڻ کان تجديدي توانائي ڏانهن منتقلي جي ضرورت تي زور ڏنو.سُڪار فائونڊيشن جي جنرل مئنيجر تيرٿ جهانگي، شاھد شاھ، نديم روشن شاھ، دريا خان، گوري ڀيل، وڪيل رفيق ھنگورجو، چمن لوڪل واپاري ۽ امتاز جوڻيجو سميت ٻين ڳالهائيندڙن چيو ته توانائي پاليسين ۾ بنيادي سڌارا آڻڻ ۽ موسمياتي تبديليءَ سان متاثر ٿيندڙ علائقن ۽ ماڻھن کي اوليت ڏيڻ وقت جي اهم ضرورت آهي. مقررن جو چوڻ هو ته بجليءَ جي وڌندڙ قيمتن ۽ توانائي تائين محدود رسائي عام ماڻهن لاءِ وڏو چيلينج بڻجي وئي آهي، تنهن ڪري حڪومت کي تجديدي توانائيءَ کي فروغ ڏيڻ لاءِ قدم کڻڻ گهرجن. فورم ۾ زور ڏنو ويو ته سڀني لاءِ سستي ۽ قابلِ رسائي شمسي توانائي مهيا ڪرڻ، سولر تي لاڳو 10 سيڪڙو سيلز ٽيڪس ختم ڪرڻ، ۽ گهٽ آمدني وارن لاءِ آسان قسط وارا قرض ڏيڻ ضروري آهي. ان سان گڏ فاسل ٻارڻ تي ڀاڙڻ ختم ڪري نون فاسل منصوبن کي روڪڻ ۽ مالي ذريعا تجديدي توانائي ڏانهن منتقل ڪرڻ جو مطالبو پڻ ڪيو ويو. ڳالهائيندڙن چيو ته موسمي انصاف لاءِ لاس اينڊ ڊيميچ فنڊ کي شفاف بڻايو وڃي ۽ متاثر عوام تائين وعدي ڪيل مالي مدد پهچائي وڃي. ٻوڏ متاثر علائقن جي بحالي لاءِ قرض بدران امدادي سهائتا، روزگار جا موقعا ۽ عورتن ۽ نوجوانن جي شموليت کي يقيني بڻايو وڃي. انڊس ڪنسورشيم جي ترجمان موجب، فورم متاثر ماڻھن جي گڏيل آواز کي اجاگر ڪيو، جيڪي منصفانه توانائي حلن ۽ موسمي انصاف جو مطالبو ڪري رهيا آهن. تقريب جي پڄاڻي “پيپلز چارٽر فار انرجي اينڊ ڪلائيميٽ جسٽس 2025” جي صحيح مهم سان ٿي