سنڌ سرڪار جو ٻوڏ متاثرن لاءِ امدادي سامان پشاور پهچايو ويو

100 فلٽريشن پلانٽ ۽ راشن جا 4000 بيگس متاثرن لاءِ ڏنا ويا: صوبائي وزير مخدوم محبوب الزمان

ڪراچي (اسٽاف رپورٽر) حڪومت سنڌ طرفان خيبرپختونخوا جي ٻوڏ متاثر خاندانن لاءِ امدادي سامان گورنر هائوس پشاور پهچايو ويو،امدادي سامان سان گڏ صوبائي وزيرِ مخدوم محبوب الزمان، سيڪريٽري بحالي اختر حسين بگٽي ۽ ڊائريڪٽر جنرل پي ڊي ايم اي سنڌ سلمان شاهه سميت ٻيو وفد موجود هو، پ پ خيبرپختونخوا صوبائي صدر محمد علي شاهه باچا، انجمن هلال احمر خيبرپختونخوا جي وائيس چيئرمين فرزند وزير ۽ گورنر ڪي پي ڪي فيصــل ڪريم ڪنڊي جي پرنسپل سيڪريٽري، سنڌ حڪومت جي وفد جو استقبال ڪيو، امدادي سامان جي باضابطا حوالي لاءِ گورنر هائوس پشاور ۾ تقريب ٿي، جتي صوبائي وزير مخدوم محبوب الزمان امدادي سامان انجمن هلال احمر خيبرپختونخوا حوالي ڪيو. مخدوم محبوب الزمان چيو ته بلاول ڀٽو زرداري جي هدايت تي امدادي سامان متاثر ضلعن ڏانهن موڪليو ويو آهي، وڌيڪ امداد به فراهم ڪئي ويندي، هن چيو ته سنڌ جي وزيراعليٰ مراد علي شاهه، گورنر فيصل ڪريم ڪنڊي سان مسلسل رابطي ۾ آهن.