نوشهروفيروز: قومي شاهراهه تي خوفناڪ حادثو، 8 ڄڻا زخمي

نوشهرو فيروز(ڊ ر) نوشهروفيروز قومي شاهراهه تي خوفناڪ ٽرئفڪ حادثو، فرحان ڪوچ ٽرالر سان ٽڪرائجي وئي، ڊرائيور سميت 8 مسافر زخمي، ٻن جي حالت ڳڻتي جوڳي تفصيلي خبر موجب نوشهرو فيروز قومي شاهراهه تي سني پيٽرول پمپ ويجهو سکر کان ڪراچي ويندڙ مسافر ڪوچ فرحان ڪوچ ۽ ٽرالر ۾ خوفناڪ ٽڪر جي نتيجي ۾ ڊرائيور سميت 8 مسافر زخمي ٿي پيا، جڏهن ته ٻن ڄڻن کي ڳڻتي جوڳي حالت ۾ نوابشاهه اسپتال منتقل ڪيو ويو آهي. عيني شاهدن موجب، حادثو ان وقت پيش آيو جڏهن ڪوچ ڊرائيور گڏھ گاڏي کي بچائڻ جي ڪوشش ۾ ڪنٽرول وڃائي ويٺو، نتيجي طور سامهون ايندڙ ٽرالر سان زورائتي ٽڪر ٿي پئي. ٽڪر جي شدت سبب ڪوچ جو اڳيون حصو مڪمل طور تباهه ٿي ويو ۽ ڪيترائي مسافر اندر ڦاٿل رهيا، جن کي پوليس ۽ علائقي واسين ڪڍي اسپتال منتقل ڪيو. زخمين ۾ ڊرائيور صدام حسين، بدر علي، اشفاق علي، حاجي خان، غلام مصطفيٰ ۽ ڪامران سميت 8 ڄڻا شامل آهن. زخمين کي سول اسپتال نوشهروفيروز منتقل ڪيو ويو، جتان ٻن مسافرن کي ڳڻتي جوڳي حالت سبب پيپلز ميڊيڪل ڪاليج اسپتال نوابشاهه ريفر ڪيو ويو. حادثي بعد موٽروي پوليس ۽ ايس ايڇ او نوشهروفيروز واقعي واري هنڌ پهچي علائقي کي گهيري ۾ آڻي ٽرئفڪ بحال ڪرائي. پوليس مطابق، ابتدائي تحقيق موجب حادثو گڏھ گاڏي کي بچائيندي پيش آيو، پر واقعي بابت وڌيڪ جاچ جاري آهي. عوامي حلقن پاران قومي شاهراهه تي غيرقانوني گڏھ گاڏين ۽ بي احتياطيءَ خلاف انتظاميا کان ڪارروائي جو مطالبو ڪيو ويو آهي.