سنڌ زرعي يونيورسٽي ۾ ماھرن پاران ڊيٽا بنياد فيصلن جي اهميت تي زور

ٽنڊوڄام (رپورٽر) سنڌ زرعي يونيورسٽي ٽنڊوڄام جي وائيس چانسلر پروفيسر ڊاڪٽر الطاف علي سيال چيو آهي ته زرعي، ماحولياتي ۽ سماجي-معاشي چئلينجز کي مؤثر طريقي سان منهن ڏيڻ لاءِ ڊيٽا تي ٻڌل فيصلا ڪرڻ وقت جي اهم ضرورت بڻجي چڪي آهي، هن چيو ته پاڪستان ۾ پائيدار ترقي ۽ بهتر پاليسي سازي لاءِ ڊيٽا اينالٽڪس ۽ ڊجيٽل ٽرانسفارميشن جهڙا جديد اوزار استعمال ڪرڻ هاڻي اڻٽر ٿي ويا آهن، ھن ان قسم جو ڳالھيون سنڌ زرعي يونيورسٽي ۾ “ڊيٽافيسٽ 2025 — ترقي لاءِ ڊيٽا جي طاقت کي ڪتب آڻڻ” جي عنوان تحت ھڪ آگاهي سيمينار کي خطاب دوران ڪيون، هن زور ڀريو ته يونيورسٽين کي تحقيق توڙي پاليسي سازي ۾ ڊيٽا جي اثرائتي استعمال کي هٿي ڏيڻ گهرجي ته جيئن قومي ترقي جا هدف جديد بنيادن تي حاصل ڪري سگھجن، بيورو آف اسٽيٽسٽڪس پاڪستان جي صوبائي ڊائريڪٽر جنرل منور علي گھانگھري پنهنجي خطاب ۾ ثبوتن تي ٻڌل منصوبابندي ۽ پاليسي سازي ۾ صحيح ۽ قابلِ اعتماد ڊيٽا جي اهميت تي روشني وڌي، هن چيو ته حڪومت شمارياتي نظام کي مضبوط بڻائڻ ۽ يونيورسٽين سان ڀائيواري وسيلي ڊيٽا لٽريسي ۽ تحقيقي صلاحيتن کي وڌائڻ لاءِ قدم کنيا آهن، ريجنل هيڊ علي ڏنو مهر ڊيٽافيسٽ 2025 جا مقصد، سرگرميون ۽ امڪاني نتيجا پيش ڪندي تفصيلي پريزينٽيشن ڏني، هن شاگردن، محققن ۽ پاليسي سازن کي ڊيٽا انوويشن، تحقيق ۽ عملي منصوبن ۾ حصو وٺڻ جي صلاح ڏني ته جيئن اڪيڊميا ۽ پاليسي سازي جي ادارن ۾ مضبوط لاڳاپا قائم ٿي سگهن، سيمينار دوران عدنان مهمانن کي ڀليڪار ڪيو، ان موقعي تي ڊائريڪٽر يونيورسٽي ايڊوانسمينٽ ۽ فنانشل اسسٽنس ڊاڪٽر محمد اسماعيل ڪنڀر، پروفيسر غلام مجتبيٰ خشڪ، ڊاڪٽر ويِلو سوٽهڙ، ڊاڪٽر عرفان شيخ، استاد ۽ شاگردن جي وڏي انگ ۾ شرڪت ڪئي۔