ڊي سي ٺٽو پاران ايس آر ٽي سي بس اسٽينڊ جي بحالي واري ڪم جو معائنو
سرمد علي ڀاڳت لاڳاپيل عملدارن کان ڪم جي اڳڀرائي بابت بريفنگ پڻ ورتي
ٺٽو (محمد شفيق ڀٽي)ڊپٽي ڪمشنر ٺٽو سرمد علي ڀاڳت لاڳاپيل ادارن جي عملدارن سان گڏ ڪيترن ئي سالن کان غيرفعال پيل پراڻي ايس آر ٽي سي بس اسٽينڊ کي ٻيهر فعال بڻائڻ لاءِ هلندڙ بحالي جي ڪم جو معائنو ڪيو ۔ ان موقعي تي هن لاڳاپيل عملدارن کان ڪم جي اڳڀرائي بابت بريفنگ پڻ ورتي۔ ڊپٽي ڪمشنر لاڳاپيل عملدارن کي هدايت ڪئي ته بس اسٽينڊ جي بحالي جو ڪم جلد کان جلد مڪمل ڪيو وڃي ته جيئن شهر جي وچ ۾ بيٺل غيرقانوني بسن ۽ ويگنن کي بس اسٽينڊ تي منتقل ڪري سگهجي، جنهن سان ٽريفڪ جي آمدرفت ۾ آساني پيدا ٿيندي ۽ عوام کي بهتر سفري سهولتون مهيا ٿيڻ سان گڏ شهرين کي خوشگوار ماحول به فراهم ٿيندو۔ هن چيو ته بس اسٽينڊ جي فعال ٿيڻ سان نه رڳو مسافرن کي سهولت ملندي پر شهر ۾ ٽريفڪ جي مسئلن ۾ به نمايان گهٽتائي ايندي ۔ هن وڌيڪ هدايت ڪئي ته صفائي سٿرائي۽ ٻين بنيادي سهولتن کي يقيني بڻايو وڃي ته جيئن بس اسٽينڊ کي مڪمل طور فعال بڻائي سگهجي۔ ڊپٽي ڪمشنر چيو ته ضلعي انتظاميه عوام کي بهتر سهولتون مهيا ڪرڻ لاءِ عملي قدم کڻي رهي آهي ۽ ان سلسلي ۾ سڀئي ادارا پنهنجون ذميواريون بهتر نموني نڀائين.