پاڻي کان محروم چشما ڳوٺ جا رهواسي رستن تي نڪري آيا، احتجاجي ريلي

ملير (رپورٽ: عبدالرشيد مورجھريو) ابراهيم حيدري ٽائون جي علائقي چشما ڳوٺ ۾ پيئڻ جي صاف پاڻي سميت بنيادي سهولتن جي سخت کوٽ خلاف قومي عوامي تحريڪ ملير ضلعي پاران ڪاشف خاصخيلي، حسين سنڌي، ساجد خاصخيلي، راجا خاصخيلي فيروز ضمير جي اڳواڻي ۾ احتجاجي ريلي ڪڍي وئي. احتجاجي ريلي ۾ پارٽي اڳواڻن، ڪارڪنن، سماجي شخصيتن ۽ چشمان ڳوٺ جي رهواسين وڏي تعداد ۾ شرڪت ڪئي ريلي چشما ڳوٺ جي مختلف گهٽين ۽ مکيه رستن مان گذري مک چوڪ چوڪ تي پهتي جتي شرڪت ڪندڙن هٿن ۾ پلي ڪارڊ، بينر ۽ جهنڊا کڻي “پاڻي ڏيو، زندگي بچايو”، “چشما ڳوٺ سان ناانصافي بند ڪريو” ۽ “ضلعي انتظاميا جا وعدا ناڪام” جهڙا نعرا هنيا.قومي عوامي تحريڪ ملير جي اڳواڻن خطاب ڪندي چيو ته چشمان ڳوٺ جا رهواسي سالن کان پيئڻ جي پاڻي، نيڪالي، روڊن، بجلي، صحت ۽ تعليم جهڙين بنيادي سهولتن کان محروم آهن. هنن چيو ته پاڻي جهڙي بنيادي ضرورت نه هجڻ سبب عورتون ۽ ٻار ميلن پنڌ ڪري پاڻي آڻڻ تي مجبور آهن، جڏهن ته غريب ماڻهو مهانگو ٽينڪر پاڻي خريد ڪرڻ به نٿا سگهن.اڳواڻن ڪراچي واٽر اينڊ سيوريج بورڊ ۽ لاڳاپيل ادارن تي سخت تنقيد ڪندي چيو ته بار بار درخواستن ۽ احتجاجن باوجود اختيارين جي ڪنن تي جونءِ به نٿي چُري. هنن خبردار ڪيو ته جيڪڏهن فوري طور چشمان ڳوٺ کي پاڻي ۽ ٻيون بنيادي سهولتون فراهم نه ڪيون ويون ته احتجاج جو دائرو ضلعي سطح کان وڌائي شهر سطح تائين آندو ويندو.ريلي ۾ شامل رهواسين چيو ته پاڻي جي کوٽ سبب بيماريون وڌي رهيون آهن ۽ روزمرهه زندگي مفلوج ٿي چڪي آهي. احتجاج آخر ۾ پرامن نموني سان ختم ڪيو ويو، جڏهن ته انتظاميا کان ترت ۽ عملي قدم کڻڻ جو پُرزور مطالبو ڪيو ويو.