نوشھروفيروز ضلعي ڪائونسل جو چيئرمين سھيل اختر عباسي جي صدارت ۾ اجلاس ٿيو

views | 21st Nov 2023 • سنڌي خبرون

نوشھروفيروز ضلعي ڪائونسل جو چيئرمين سھيل اختر عباسي جي صدارت ۾ اجلاس ٿيو

نوشهرو فيروز (ڊر) ضلعي ڪائونسل جو اجلاس چيئرمين سهيل اختر عباسي جي صدارت هيٺ ٿيو. اجلاس ۾ ضلعي ڪائونسل جي ميمبر قادر بخش ٺهراءُ پيش ڪيو ته ترقياتي ڪمن تي پابندي آهي جنهن سبب ترقياتي ڪم نٿا ٿي سگهن. اجلاس ۾ ترقياتي ڪمن تي پابندي هٽائڻ لاءِ متفقه ٺهراءُ پاس ڪيو ويو، اجلاس ۾ ضلعي ڪائونسل جي ميمبر محمد الياس ٺهراءُ پيش ڪيو ته سنڌ حڪومت پاران ضلعي ڪائونسل جون سرڪاري گاڏيون قبضي ۾ ورتيون ويون آهن. جنهن سبب ضلعي ڪائونسل جا چيئرمين ۽ وائيس چيئرمين سرڪاري گاڏين کان محروم آهن، اجلاس ۾ متفقه ٺهراءُ پاس ڪيو ويو ته سنڌ حڪومت ضلعي ڪائونسل جون گاڏيون فوري طور واپس ڪري. اجلاس ۾ ضلعي ڪائونسل جي ميمبر چوڌري شاهد علي آرائين فلسطين تي اسرائيل جي حملي خلاف ۽ فلسطيني ڀائرن سان يڪجهتي جي اظهار لاءِ ٺهراءُ پيش ڪيو، هن چيو ته اسرائيلي فوج هزارين مسلمان نوجوانن، عورتن ۽ ٻارن کي شهيد ڪري ڇڏيو آهي ۽ اتي تيل ۽ ٻيو سامان ضايع ڪيو ويو آهي. انساني جانيون بچائڻ جي فوري ضرورت آهي، ايوان ۾ اسرائيلي ظلمن خلاف ۽ فلسطيني مسلمانن جي حق ۾ ٺهراءُ اتفاق راءِ سان منظور ڪيو ويو. ضلعي ڪائونسل ميمبر امير علي چانڊيو ضلعي ۾ زرعي ڀاڻن ۽ فصلن جي ٻج جي بليڪ مارڪيٽنگ خلاف ڪارروائي لاءِ ٺهراءُ پيش ڪيو، جيڪو اتفاق راءِ سان منظور ڪيو ويو. اجلاس ۾ مجيب الرحمان تنيو ضلعي ۾ امن امان جي خراب صورتحال تي ٺهراءُ پيش ڪيو، جنهن کي ايوان منظور ڪندي ضلعي ۾ چيڪ پوسٽ قائم ڪرڻ جو مطالبو ڪيو. چيئرمين ضلعي ڪائونسل اجلاس ۾ شرڪت ڪندڙ سمورن ميمبرن کي چيو ته 20 لک روپين جي ترقياتي اسڪيمن لاءِ پروپوزل تيار ڪن ته جيئن پابندي ختم ٿيڻ کانپوءِ ڪم ٿي سگهي.