ٺٽي ۾ عورتاڻي آواز تي ھرکجي اغوا ٿيل ميونسپل ملازمن جي بازيابي لاءِ احتجاج

عرفان مسيح جي آزادي لاءِ ڌاڙيل ھڪ ڪروڙ گھري رھيا آھن، پوليس ڪا ڪارروائي ناھي ڪئي: وارث

ٺٽو(رپورٽ شفيق ڀٽي) ٺٽي مان عورتاڻي آواز تي ھرکجي گھوٽڪي ۽ ڪنڌ ڪوٽ جي ڌاڙيلن جي ور چڙھيل ٺٽي جي نوجوان ميونسپل ڪميٽي ٺٽو جي اغوا ٿي ويل ملازم عرفان مسيح جي بازيابي لاءِ اغوا ٿي ويل نوجوان جي وارثن، ميونسپل ڪميٽي ٺٽو جي ملازمن، آپڪا يونٽ ميونسپل ڪميٽي ٺٽو ۽ مسيح برادري طرفان ھڪ احتجاجي مظاھرو ميونسپل ڪاميٽي ٺٽو کان ٺٽي شھر جي مين اسٽاپ تائين ڪيو ويو، جنھن ۾ ٺٽي جي سياسي، سماجي، قومپرست اڳواڻن ۽ شھرين وڏي انگ ۾ شرڪت ڪئي، احتجاجي مظاھري کي خطاب ڪندي اغوا ٿي ويل عرفان مسيح جي وارثن ماء ۽ وني چيو تہ سندن نوجوان کي اغوا ٿيندي ھڪ ھفتو گذري ويو اھي، پر اڃان تائين بازياب ٿي ناھي سگھيو، سندس آزادي لاء ڌاڙيل ھڪ ڪروڙ روپين جي گھر ڪري رھيا آھن، جيڪا رقم سندن وس کان ٻاھر آھي، ھنن نگران حڪومت جي اعلي اختيارين کان گھر ڪئي تہ اغوا ٿي ويل عـرفان مسيح کي بازياب ڪرائي کين پريشاني کان بچايو وڃي، احتجاج دوران اغوا ڪار ڌاڙيلن پاران اغوا ٿي ويل عرفان مسيح جي گھر واري وٽ سندس موبائل فون تي فون اچي ويئي، جن کيس ڌمڪي ڏيندي چيو تہ فورن کين ھڪ ڪروڙ روپيہ موڪليا وڃن، ٻئي صورت ۾ سندس مڙس کي قتل ڪري درياء ۾ اڇلايو ويندو، آيل فون تي اغوا ٿي ويل ٺٽي واسي نوجوان جي زال ڌاڙيلن کي فون وسيلي منٿون ۽ اپيلون ڪندي رھي تہ منھنجي نياڻين جي واسطي منھنجي ور کي ڪجھ نہ ڪجو، آء مسڪين آھيان اوھان ھڪ ڪروڙ گھريو آھي مون تہ صرف وڏي ڪوششن سان ھن وقت تائين صرف 20 ھزار روپيہ گڏ ڪري سگھي آھيان، ھنن ٺٽو پوليس سميت گھوٽڪي ۽ ڪنڌ ڪوٽ جي پوليس کي اپيل ڪئي تہ ھو پنھنجو ڪردار ادا ڪري ٺٽي جي رھواسي نوجوان کي بازياب ڪرائي کين پريشاني کان بچائين، احتجاجي مظاھري کي ايس ٽي پي اڳواڻ سيد جلال شاھ، راجو قريشي، آپڪا اڳواڻ ارباب سجاد سمون ۽ ٻين پڻ خطاب ڪري متاثر مسيح برادري سان يڪجھتي جو اظھار ڪيو.