سنڌي قوم جا عاشق ليڊر ۽ انهن جي محبوب قوم...!!

ڊاڪٽر برڪت نوناري

هڪ نوجوان اداڪاريء جو وڏو شوقين هئو, هونئن ته سندس خواهش هئي ته بس هڪ ڀيرو بمبئي وڃين ماڌوريء سان گڏ فلم ڪريان پر جنرل ضياء جي جهادي پاليسين سبب اهو ممڪن ٿي نه سگهيو.
آخر ۾ مجبور ٿي ڇولن جي ريڙهي ڪڍيائين, ريڙهيء تي چئني پاسن کان ماڌوريء جون تصويرون لڳائي ڇڏيائين.
مائٽن سوچيو ته شادي ڪندو ته سڌري ويندو پر ڪو سڱ ئي نه پيو ڏيس, آخر ۾ سوٽ سان زوريء شادي ڪرايائونس.
شاديء جي رات گهوٽ پنهنجي پوري ڪمري ۾ ماڌوريء جون تصويرون لڳائي ڇڏيون, سهاڳ رات جو جشن ملهائي وڏو ٿڌو ساھ ڀري چيائين ته هل مائي ته ماڌوري باقي اسان ته رڳو جنڙيون سمهاريون ويٺا آهيون.
ٻئي ڏينهن تي مائي پنهنجي موڙي جا پيسا کڻي مارڪيٽ مان عامر خان جون تصويرون وٺي آئي ۽ ماڌوريء جون تصويرون لاهي عامر خان جون تصويرون هڻي ڇڏيائين.
مڙس گهر پهتو ته رڙ ڪري چيائينس اڙي هي ڇاهي؟
زال کلي چيس ته مرد ته بس عامر خان باقي اسان جي مٿان ته جن چڙهيا ويٺا آهن.
سنڌي قوم جي ليڊرن جو ۽ سنڌي قوم جو به ساڳيو ئي حال آهي. ھر ھڪ ليڊر پاڻ کي اسٽالن جيترا اختيار چاھي ٿو، چين جھڙي فرمانبردار قوم چاھي ٿو،
آمريڪا جھڙا اختيار چاھي ٿو ۽ اسرائيل جيتري بجيٽ گهري ٿو پر قوم وٽ بہ پنھنجون الڳ ڊمانڊ آھن تہ ليڊر ۾ لينن جيترو عقل ھجي، چي گويرا جيتري ھمت ھجي ۽ نيلسن منڊيلا وانگر ٽيھ چاليھ سال جيل ڪٽڻ جو صبر ھجي پوءِ ڏسنداسين.