سنڌي ادبي سنگت ملير جي گڏجاڻي عاصم عبدالمجيد ابڙو جي صدارت هيٺ ٿي گذري

ملير (رپورٽ: عبدالرشيد مورجھريو) سنڌي ادبي سنگت شاخ ملير جي دستوري گڏجاڻي خوبصورت شاعر عاصم عبدالمجيد ابڙو جي صدارت هيٺ عمر مارئي ڳوٺ، قائدآباد ۾ شاخ جي جوائنٽ سيڪريٽري امرتا ڏاهري جي ميزبانيءَ ۾ منعقد ٿي. گڏجاڻي ۾ سيڪريٽري مجيب سنڌي، غفور شاھ تقوي، سڪندر سرواڻ، قمبر ٻٽ، اصغر مهرائي، مختيار مگسي، مظهر حسين وريائي، عاصم عبدالمجيد ابڙو ۽ امرتا ڏاهري پنهنجي نڪور شاعري پيش ڪئي. گڏجاڻي ۾ پيش ڪيل شاعري تي ڳالهائيندي نامياري ليکڪ ۽ صحافي سامي ميمڻ چيو ته سنڌي ادبي سنگت ۾ معياري ۽ نڪور تخليقون پيش ٿيڻ گهرجن، جن ۾ سماجي، اصلاحي ۽ مزاحمتي عنصر شامل هجن. هن زور ڀريو ته سنگت طرفان اهڙا ادبي پروگرام منعقد ڪيا وڃن، جتي مختلف موضوعن تي بحث مباحثا ٿين، جيئن نئين نسل کي به سکڻ ۽ لاڀ حاصل ڪرڻ جو موقعو ملي سگهي. گڏجاڻي ۾ صدارتي راءِ ڏيندي عاصم عبدالمجيد ابڙو چيو ته ملير شاخ ۾ تمام سٺا ۽ سينئر تخليقڪار شامل آهن ۽ شاخ مسلسل بهتر ادبي ڪم ڪري رهي آهي. هن چيو ته گڏجاڻين ۾ تنقيدي ۽ اصلاحي ڪلاس هلائڻ سان نوجوانن کي سکڻ جو بهتر موقعو ملي ٿو، ڇاڪاڻ ته تخليقن ۾ تنقيد سان ئي وڌيڪ نکار پيدا ٿيندو آهي. گڏجاڻي ۾ ظهير ڏاهري، عنايت علي شاھ ۽ عبدالواحد بليدي پڻ شرڪت ڪئي، جڏهن ته گڏجاڻي جي ڪارروائي جوائنٽ سيڪريٽري امرتا ڏاهري هلائي.