ٽنڊوآدم ۾ بدامني، منشيات فروشي، جوا خلاف جماعت اسلامي پاران بينر لڳايا ويا، شهرين کي تحفظ ڏيڻ جو مطالبو

سانگھڙ (حسنين عاشق ساند) ٽنڊوآدم ۾ وڌندڙ بدامني، منشيات فروشي، جوا خلاف جماعت اسلامي پاران شهر ۾ بينر لڳايا ويا، شهرين کي تحفظ مهيا ڪري ڏيڻ جو مطالبو. رپورٽ موجب جماعت اسلامي ٽنڊوآدم پاران شهر جي امير سيد عريف الله سيفي، نائب امير مشتاق عادل، عبدالغفور انصاري ۽ ٻين جي اڳواڻيءَ ۾ شهر جي مختلف علائقن ۾ شهر اندر بد امنيءَ خلاف وال پوسٽر لڳائي احتجاج ڪيو ويو آهي، ان موقعي تي اڳواڻن چيو ته شهر اندر بدامني عروج تي پهچي چڪي آهي، ڏينهن ڏٺي جو شهرين کان موٽرسائيڪلون، ڪارون، روڪ رقم ڦر ٿيڻ روز جو معمول بڻجي چڪو آهي، شهري عدم تحفظ جو شڪار ٿي چڪا آهن ۽ کلي رهزنيءَ جي وارداتن سبب شهري تمام گهڻي خوف ۽ حراس ۾ مبتلا ٿي چڪا آهن، جڏهن ته شهر اندر منشيات فروشي، جوا، آڪڙا پرچي، شراب جو ڪاوربار وڌي ويو آهي جنهن سبب نوجوان نسل، شاگرد، عورتون، ننڍا معصوم ٻار تباهيءَ طرف وڃي رهيا آهن. هنن چيو ته پوليس شهرين کي تحفظ ڏيڻ ۽ امن امان جي صورتحال کي برقرار رکڻ ۾ مڪمل ناڪام وئي آهي. هنن مطالبو ڪيو آهي ته شهر اندر فور طور تي امن قائم ڪري شهرين کي تحفظ فراهم ڪري ڏنو وڃي ۽ منشيات فروشي، جوا، آڪڙا پرچي ۽ ٻين سماجي برائين خلاف سخت ڪاروائي ڪئي وڃي ته جيئن اسان جو معاشرو براين کان محفوظ رهي سگهي.