نوشہروفیروز میں کینالز کیخلاف احتجاج، دلہا دلہن باراتیوں سمیت دھرنے میں پہنچ گئے

نوشہرو فیروز؛ سندھ کے ضلع نوشہرو فیروز میں متنازع نہریں نکالنے کے خلاف دلہا دلہن اور باراتیوں کے ہمراہ دھرنے میں شرکت کے لیے پہنچ گئے ہیں۔ حکومت کی اہم اتحادی جماعت پاکستان پیپلزپارٹی سمیت سندھ کی قوم پرست ودیگر سیاسی جماعتیں اور وکلا برادری 6 نہریں نکالنے کے خلاف مسلسل احتجاج کررہی ہیں۔ یاد رہے کہ چیف آف آرمی اسٹاف جنرل عاصم منیر اور وزیراعلیٰ پنجاب مریم نواز نے 15 فروری کو چولستان کے اس بڑے منصوبے کا افتتاح کیا تھا جس کا مقصد جنوبی پنجاب کی زمینوں کو سیراب کرنا تھا۔ وفاقی حکومت کی جانب سے جنوبی پنجاب میں 1.2 ملین ایکڑ ’بنجر زمین‘ کو سیراب کرنے کے لیے 6 نہریں تیار کرنے کے لیے شروع کیے گئے 3.3 ارب ڈالر کے گرین پاکستان انیشی ایٹو (جی پی آئی) کی پیپلز پارٹی سمیت کسانوں اور دیگر اسٹیک ہولڈرز نے سخت مخالفت کی۔ سندھ میں نہروں کے خلاف احتجاج کا یہ سلسلہ مسلسل جاری ہے جب کہ آج ضلع نوشہرو فیروز میں کنڈیارو قومی شاہراہ پر احتجاجی دھرنے میں دلہا دلہن بھی باراتیوں سمیت پہنچ گئے اور سب نے کینالز نا منظور کے نعرے لگائے۔