بھارت کی مقبوضہ کشمیر کی 2 سیاسی تنظیموں پر کالے قانون کے تحت پابندی عائد

سری نگر: بھارت نے مقبوضہ کشمیر کی 2 سیاسی تنظیموں پر کالے قانون کے تحت 5 سال کی پابندی عائد کر دی۔ بھارتی وزارت داخلہ نے میر واعظ عمر فاروق کی عوامی ایکشن کمیٹی اور جموں و کشمیر اتحاد المسلمین پر پابندی لگانے کا نوٹیفکیشن جاری کرتے ہوئے ان تنظیموں پر علیحدگی پسند سرگرمیوں میں ملوث ہونے کا الزام عائد کیا ہے۔ یاد رہے کہ 2019 سے اب تک بھارتی حکومت نے مقبوضہ کشمیر کی 10 سیاسی تنظیموں پر پابندیاں عائد کی ہیں۔ مقبوضہ کشمیر کی سابق وزیراعلیٰ محبوبہ مفتی کا کہنا ہے کہ سیاسی تنظیموں پر پابندی جموں و کشمیر کے سیاسی منظرنامے کے لیے ایک اور بڑا دھچکا ہے، اور اختلاف رائے کو دبانے سے تناؤ میں مزید اضافہ ہوگا۔ انہوں نے کہا کہ جمہوریت شہریوں کے حقوق کا تحفظ کرتی ہے، جبکہ بی جے پی کا آوازوں کو دبانے کا سیاسی ایجنڈا کشمیریوں کے بنیادی حقوق کی خلاف ورزی کر رہا ہے۔ بھارت کو اپنے ظالمانہ ہتھکنڈوں سے باز آنا چاہیے۔