نوشهروفيروز ۾ اسپورٽس اينڊ يوٿ افيئر ڊپارٽمينٽ پاران منعقد راندين جا مقابلا پڄاڻي تقريب منعقد

راندين جا روزمرهه جي زندگي تي گهرا اثر پون ٿا: ڊي سي محمد ارسلان سليم

نوشهرو فيروز (اسپورٽس نيوز)ڊپٽي ڪمشنر محمد ارسلان سليم اسپورٽس اينڊ يوٿ افيئر ڊپارٽمينٽ پاران ضلعي گيمز 2024 جي اختتامي تقريب ۾ شرڪت ڪئي. هن راندين ۾ شاندار ڪارڪردگي ڏيکاريندڙ رانديگرن ۾ ٽرافيون، ميڊل ۽ سرٽيفڪيٽ پڻ ورهايا. ڊسٽرڪٽ گيمز 2024 جي اختتامي تقريب گورنمينٽ بوائز ڊگري ڪاليج نوشهروفيروز ۾ ٿي. تقريب ۾ ضلعي اسپورٽس آفيسر نوشهروفيروز شهباز خان عباسي، استاد رفيق احمد خانزاده، ڊاڪٽر عبدالقادر ميمڻ ۽ شهرين جي وڏي انگ شرڪت ڪئي، ان موقعي تي محرابپور، ڪنڊيارو، ٺارو شاهه، نوشهروفيروز جي مختلف تعليمي ادارن جي شاگردن جي ٽيمن شرڪت ڪئي. تقريب ۾ ڪرڪيٽ، والي بال، ڪراٽي ۽ ٻين راندين ۾ بهترين ڪارڪردگي ڏيکاريندڙ ٽيمن کي گولڊ، سلور ميڊل ۽ ٽرافيون ڏنيون ويون. ان موقعي تي ڳالهائيندي ڊپٽي ڪمشنر چيو ته راندين جا اسان جي روزمرهه جي زندگي تي گهرا اثر پون ٿا پر اسان راندين جي اهميت کي سمجهڻ کان رهجي ويا آهيون. اڄ هن گرائونڊ ۾ نوجوانن جي ايتري وڏي تعداد ۾ موجود ڏسي مونکي تمام گهڻي خوشي ٿي آهي ۽ ڪوشش ڪنداسين ته مستقبل ۾ به اهڙا مقابلا منعقد ڪرايون.