سنڌ ملاح فورم پاران ڄامشورو ۾ مهاڻن جي عالمي ڏهاڙو ملهائڻ جي حوالي سان گڏجاڻيون

سنڌ ملاح فورم جي مرڪزي سينيئر نائب صدر ڏاڏا آدم گندرو ۽ ٻين اڳواڻن مختلف علائقن ۾ گڏجاڻيون ڪيون

ٺٽو( ڊر)سنڌ ملاح فورم پاران ڄامشورو ۾ ماھيگيرن، ملاحن جي عالمي ڏيھاڙي 21 نومبر کي ڀرپور نموني ملھائڻ ۽ ان ۾ ملاح برادري جي شرڪت کي يقيني بنائڻ لاء سنڌ ملاح فورم جي اڳواڻن پاران ملاح برادري جي ماڻھن سان گڏجاڻين جو سلسلو جاري آھي، ان سلسلي ۾ سنڌ ملاح سنڌ جي مرڪزي سينيئر نائب صدر ڏاڏا آدم گندرو ۽ ضلعي ٺٽي جي صدر محمد ايوب ملاح پاران غلام الله، ميرپور ساڪرو، ور شھر، ڳوٺ محمد صديق ڀوپاڻي ملاح، ڳوٺ محمود ميربحر، گھارو، گجو ۽ ان جي آسپاس جي رھواسي ملاح برادري سان گڏجاڻيون ڪري کين سنڌ ملاح فورم پاران 21 نومبر ملاحن جي عالمي ڏيھاڙي کي ڄامشورو ۾ ملھائڻ جون دعوتون ڏنيون، جتي ملاح برادري پاران ڀرپور نموني شرڪت ڪرڻ جي خاطري ڪرائي ويئي، مختلف ڳوٺن ۾ ٿيل ميڙاڪن کي خطاب ڪندي ملاح اڳواڻن ڏاڏا آدم گندرو ۽ ٻين چيو تہ سنڌ ۾ وڏي آبادي ملاحن، ماھيگيرن جي ھوندي بہ کين ھر دور ۾ ديوار سان لڳائي کين ڪي بہ بنيادي سھولتون نٿيون ڏنيون وڃن ۽ نہ ئي سندن روزگار جي وسيلن تي ٿيل قبضا خالي ٿي سگھيا آھن، جنھن ڪري ملاح سخت پريشان آھن، ھنن ملاحن تي زور ڀريو تہ ھو 21 نومبر تي ڄامشوري ۾ پھچي ماھيگيرن جي عالمي ڏيھاڙي تي منعقد ڪيل جلسي ۾ ڀرپور نموني شرڪت ڪري يڪجھتي جو اظھار ڪن. ھنن ملاح کي اپيل ڪندي چيو تہ ھو ايڪو ٻڌي قائم ڪري پنھنجي اولاد کي وڌ کان وڌ تعليم ڏياري انھن کي جھالت واري جھنم مان ٻاھر ڪڍن. گڏجاڻي ۾ نصير ملاح، شفيع محمد ملاح، گل حسن ملاح، سلطان ملاح، جميل ملاح، حبيب الله ملاح، جمعون ملاح، چاچا احمد ملاح، بابو ملاح، ڦل ملاح، گلزار ملاح، ذڪريا ملاح ۽ بيا پڻ شريڪ ھئا.