ملير ۾ عوامي تحريڪ جي ضلعي صدر پرهه سومرو جي صدارت هيٺ گڏجاڻي منعقد

گڏجاڻي ۾ سنڌياڻي تحريڪ پاران 17 نومبر تي ڪراچي ۾ اعلانيل عظيم الشان ريلي جي حوالي سان رٿا بندي ڪئي وئي

ملير( رپورٽ: عبدالرشيد مورجھريو) عوامي تحريڪ ضلعي ملير جي گڏجاڻي ضلعي صدر پرھ سومرو جي صدارت ۾ ٿي. جنھن ۾ عوامي تحريڪ جي مرڪزي صدر ايڊووڪيٽ وسند ٿري خصوصي شرڪت ڪئي. گڏجاڻي ۾ سنڌياڻي تحريڪ پاران 17 نومبر تي ڪراچي ۾ اعلانيل عظيم الشان ريلي جي حوالي سان رٿا بندي ڪئي وئي. گڏجاڻي کي خطاب ڪندي عوامي تحريڪ جي مرڪزي صدر ايڊووڪيٽ وسند ٿري چيو ته شهباز حڪومت آرمي چيف جي مدي ۾ واڌ وارو بل پاس ڪري جمهوريت جو قتل ڪيو آهي. ان قانونسازي وسيلي جمهوريت کي ڪمزور ڪيو ويو آهي. شهباز حڪومت مڪمل طور اسٽيبلشمينٽ جي ساٿاري بڻيل آهي. پارليامينٽ مان عوامي ڀلائي جي ڪا به قانونسازي ناهي ٿي. موجودہ هائبرڊ حڪومت کي مضبوط ڪرڻ لاءِ آئين کان مٿاهين قانونسازي ڪئي پئي وڃي. هن چيو ته سنڌ سميت ننڍين قومن جي وسيلن تي قبضو ڪرڻ لاءِ عوام دشمن قانونسازي ڪئي پئي وڃي. هڪ طرف ڪارپوريٽ زرعي فارمنگ منصوبن جي آڙ ۾ سنڌ جي 13 لک ايڪڙن کان وڌيڪ زمين نيلام ڪئي پئي وڃي ته ٻئي طرف ارسا ايڪٽ ترميم وسيلي سنڌو درياهه تي مڪمل طور تي قبضو ڪيو پيو وڃي. هن وقت ملڪ تي مڪمل طور تي عالمي سامراجي اشارن تي هلندڙ حڪومت قائم آهي. پيپلز پارٽي اقتدا جي لالچ ۾ سنڌ جو انچ انچ وڪرو ڪري ڇڏيو آهي. صدر زرداري سنڌ جي زمينن تي قبضن جو پروانو لکي ڏئي ڇڏيو آهي. صدر زرداري صدارتي سيٽ بچائڻ خاطر سنڌو درياهه به وڪرو ڪري رهيو آهي. وسند ٿري وڌيڪ چيو ته سنڌ سنڌين جو هزارين سالن کان تاريخي وطن آهي. سنڌ جي زمينن ۽ وسيلن جي مالڪي لاءِ سنڌ جو عوام پرامن جمھوري جدوجھد جاري رکندو. 17 نومبر تي سنڌياڻي تحريڪ جي عظيم الشان ريلي ۾ هزارين سنڌياڻيون ڪراچي ۾ اچي سنڌ دشمن منصوبن کي رد ڪنديون. ڪالا باغ ڊيم جيان ڇهن نون ڪينالن جي سنڌ دشمن منصوبن کي به سنڌياڻي تحريڪ دفن ڪندي. گڏجاڻي ۾ ڪامريڊ علي محمد ڪلمتي،ايڊووڪيٽ خالد تنيو، نظير ميمڻ، عزيز لانگاھ، زبير نوناري، مير نوروز ڪلمتي، شاني سومرو، زوھيب ڪلمتي ۽ ٻين اڳواڻن شرڪت ڪئي.