ملير جي کوهي ڳوٺ ۾ قائم فيڪٽرين ۾ مقامي پورهيتن کي روزگار نه ڏيڻ خلاف ڌرڻو

مقامي پورهيتن پاران فيڪٽرين جي مک گيٽ وٽ ڌرڻو هنيو ويو، فيڪٽري انتظاميه خلاف نعريبازي

ملير (رپورٽ: عبدالرشيد مورجھريو) کوهي ڳوٺ ۾ قائم فيڪٽرين ۾ مقامي پورهيتن کي روزگار نه ڏيڻ خلاف احتجاج، فيڪٽرين جو مک دروازو ۽ روڊ بند ڪري ڌرڻو هنيو ويو، احتجاج دوران انتظاميا پوليس طلب ڪري ورتي پوليس ۽ مظاهرين جي وچ ۾ ڇڪتاڻ ، فيڪٽرين مان اٿندڙ ڊسٽ سبب علائقي واسي سخت متاثر ٿي رهيا آهن، چونڊيل نمائندا مقامي ماڻهن کي روزگار ڏيارڻ ۾ ڪردار ادا ڪن، ليلا بلوچ ۽ ٻين جو ڌرڻي کي خطاب، صبح 8 وڳي کان لڳل ڌرڻو انتظاميا سان ڳالهين کان پوءِ ختم ڪيو ويو تفصيل موجب ملير جي ڪوهي ڳوٺ ۾ قائم فيڪٽرين ۾ مقامي پورهيتن کي روزگار نه ڏيڻ خلاف ليلا بلوچ ۽ ٻين جي اڳواڻي ۾ احتجاج ڪيو ويو، احتجاج ڪندڙ ڪمپنين جو مک دروازو ۽ روڊ بند ڪري ڌرڻو هڻي ويهي رهيا، انتظاميا پوليس طلب ڪري ورتي، ڪافي دير تائين پوليس ۽ احتجاج ڪندڙن جي وچ ۾ ڇڪتاڻ واري صورتحال رهي، ان موقعي تي ليلا بلوچ ۽ ٻين خطاب ڪندي چيو ته روزگار جا دروازا نه کوليا ويا ته احتجاج جاري رکيو ويندو، علائقي ۾ قائم فيڪٽرين ۽ ڪمپنين ۾ مقامي ماڻهن لاءِ روزگار جا دروازا بند ڪيا ويا آهن علائقي جي بي روزگار نوجوانن کي نظر انداز ڪيو ويو آهي، جڏهن ته علائقي ۾ قائم فيڪٽرين مان اٿندڙ ڊسٽ ۾ به علائقي واسي سخت متاثر ٿي رهيا آهن هنن ڊپٽي ڪمشنر، ايس ايس پي ملير ۽ چونڊيل نمائندن کان مطالبو ڪيو ته مقامي ماڻهن کي روزگار ڏيارڻ لاءِ پنهنجو ڪردار ادا ڪن، صبح 8 وڳي کان ٿيندڙ احتجاج کي 6 ڪلاڪ گذرڻ بعد انتظاميا ساڻن ڳالهيون ڪري مطالبن جي مڃتا جي خاطري ڪرائي جنهن بعد ڌرڻو ختم ڪيو ويو.