اياز لطيف پليجي پاران سندس امڙ مادر سنڌ جيجي زرينہ بلوچ جي ورسي تي ڀيٽا پيش

جيجي زرينہ بلوچ جي اصل سڃاڻپ صرف ادب، فن، فيملي، ٽيچنگ، گيت، شاعري ۽ ڪتاب نہ بلڪ مزاحمت، مقابلا ۽ جدوجھد جا ميدان ھئي

حيدرآباد)(بيورو) قومي عوامي تحريڪ جي سربراھ اياز لطيف پليجي پنھنجي امڙ مادر سنڌ جيجي زرينہ بلوچ جي 19 ھين ورسي جي موقعي تي ڀيٽا پيش ڪندي پيغام ڏنو تہ جيجي زرينہ بلوچ جي اصل سڃاڻپ صرف ادب، فن، فيملي، ٽيچنگ، گيت، شاعري ۽ ڪتاب نہ بلڪ مزاحمت، مقابلا ۽ جدوجھد جا ميدان ھئي، جيجي زرينہ بلوچ، محمد عثمان ڏيپلائي ۽ محمد ابراھيم جويو سميت سنڌ جي اديبن، شاعرن، وڪيلن، استادن، ھارين، مزدورن، شاگردن، سنڌياڻين ۽ لکين عوام سان گڏجي ون يونٽ خلاف جلوسن جي قيادت ڪئي. اياز لطيف پليجي چيو تہ امان زرينہ بلوچ سراپا قرباني، سراپا درد، سراپا احتجاج ھئي. ھن پنھنجي حياتي، پنھنجو وقت، پنھنجو گھر، پنھنجو فن، پنھنجو ادب، پنھنجو اولاد، پنھنجا پئسا، پنھنجا ڪتاب، پنھنجا گيت، سڀ قوم کي ارپي ڇڏيا تہ وٺ اي امڙ سنڌ، آئون اھو سڀ ڪجھ تنھنجي بقا ۽ تنھنجي جدوجھد جي ميدانن لاءِ توکي پيش ٿي ڪيان.