اڄ مادر سنڌ جيجي زرينا بلوچ جي 19هين ورسي ملھائي ويندي

قومي عوامي تحريڪ ۽ سنڌياڻي تحريڪ جو مرڪزي وفد جيجي زرينا جي مزار تي حاضري ڀريندو

حيدرآباد (بيورو) قومي عوامي تحريڪ جي ترجمان اشرف پليجي پنهنجي پريس پڌرائي ۾ ڄاڻايو آهي تہ قومي عوامي تحريڪ پاران اڄ مادر سنڌ جيجي زرينہ بلوچ جي اوڻيھين ورسي سڄي سنڌ ۾ ملھائي ويندي. قومي عوامي تحريڪ ۽ سنڌياڻي تحريڪ جو مرڪزي وفد صبح 10 وڳي سنڌ مزار تي گلن جي چادر چاڙھي کيس ڀيٽا پيش ڪئي ويندي.اشرف پليجي چيو تہ جيجي زرينہ بلوچ گيتن ذريعي مزاحمت ڪئي. ھن ون يونٽ ۽ آمريت خلاف جدوجھد ڪئي، جنرل پرويز مشرف جي آمريت ۾ ڪالاباغ ڊيم، پاڻي، سنڌ جي وحدت، وسيلن ۽ حقن لاءِ عورتن ۽ لکين عوام سان گڏجي لانگ مارچون ڪيون. سنڌ کي ھن وقت جيجي زرينہ بلوچ جھڙين مائرن جي ضرورت آھي، جيڪا آمريت، ظلم، خراب حڪمراني خلاف ھر وقت جدوجھد جي ميدان تي رھي. جيجي زرينہ بلوچ اياز لطيف پليجو جي صورت ۾ سنڌ کي اھڙو پٽ ڏنو آھي، جيڪو سنڌ جو آواز بنجي ويو آھي. اشرف پليجي وڌيڪ چيو تہ پنجاب جي چولستان کي آباد ڪرڻ لاءِ سنڌو درياءَ مان 176 ڪلوميٽر ڊگهو ڪئنال ٺاھڻ جي سنڌ دشمن سازش ڪئي پئي وڃي، پنجاب ڏيڍ سئو سالن کان سنڌ جي پاڻي تي ڌاڙا ھڻي رھيو آھي. چولستان جي لکين ايڪڙن جي فارمنگ معنيٰ سنڌ رڻ ٿي ويندي، پنجاب ڪالاباغ جو خوفناڪ پلاند ڪري رھيو آھي. چولستان ڪئنال نڪرڻ کانپوء لاڙ مڪمل تباھ ٿي ويندو. ڪراچي کان ڪشمور تائين سنڌ جا ماڻھو پيئڻ جي پاڻي لاء پريشان ٿي ويندا اشرف پليجي چيو تہ پاڻي جي جدوجھد جياپي جي جدوجھد آھي. ھي ڪروڙين ماڻھن جي زندگين جو مسئلو آھي. پيپلز پارٽي بلاول ڀٽو کي وزيراعظم بنائڻ لاءِ ڪروڙين ماڻھن جون زندگيون داءُ تي لڳائي ڇڏيون آھن. سنڌ جي وسيلن جي قيمت ادا ڪئي پئي وڃي.