آصف زرداري ايوان صدر ۾ ويھ غير آئيني ۽ سنڌ دشمن منصوبا جوڙي رھيو آھي: اياز لطيف پليجو

سنڌو درياھ مان 6 نوان ڪئنال ڪڍڻ جو منصوبو ڪروڙين ماڻھن جي اڃ مارڻ ۽ لکين ايڪڙ زمين بنجر بنائي سنڌ کي معاشي طور قتل ڪرڻ جو منصوبو آھي

حيدرآباد: قومي عوامي تحريڪ جي سربراھ اياز لطيف پليجي چيو آھي تہ گرين پاڪستان سنڌ کي بنجر بنائڻ جو منصوبو آھي. آصف زرداري ايوان صدر ۾ ويھ غير آئيني ۽ سنڌ دشمن منصوبا جوڙي رھيو آھي. صدر مملڪت کي سنڌو درياھ مان ڪئنال ڪڍڻ جو ڪو بہ اختيار ناھي. انڊس رور سسٽم ۾ ملڪ کي ضرورت جيترو پاڻي ناھي. جيڪڏھن 6 نوان ڪئنال ڪڍيا ويا تہ سنڌ بنجر ۽ ڀڙڀانگ ٿي ويندي. اياز لطيف پليجي چيو تہ سنڌو درياھ مان 6 نوان ڪئنال ڪڍڻ جو منصوبو ڪروڙين ماڻھن جي اڃ مارڻ ۽ لکين ايڪڙ زمين بنجر بنائي سنڌ کي معاشي طور قتل ڪرڻ جو منصوبو آھي. پيپلز پارٽي اقتدار عيوض سنڌ جو پاڻي ۽ وسيلا وڪڻي رھي آھي. اياز لطيف پليجي چيو تہ ڪوٽڙي کان ضرورت جيترو پاڻي نٿو ڇڏيو وڃي جنھنڪري سمنڊ اڳتي وڌي آيو آھي. سنڌ کي پھرين پنھنجي حصي جو پاڻي ڏنو وڃي ۽ ڏيڍ سئو سالن کان سنڌو درياھ تي لڳندڙ ڌاڙي جو حساب ڏنو وڃي. پاڻي کوٽ جي ڪري آبادگارن کي ٿيل نقصان جو معاوضو ڏنو وڃي. اياز لطيف پليجي چيو تہ ارسا ايڪٽ ۾ ترميم قبول ناھي، آصف زرداري غير آئيني فيصلا ڪري رھيو آھي، کيس فوري طور تي استعفي ڏيڻ گھرجي. سنڌ جي مفادن خلاف ڪو بہ فيصلو يا منصوبو قبول ناھي.