ننڍن آبادگارن کي ڪڻڪ جو سرڪاري اگھ نھ پيو ڏنو وڃي: اياز لطيف پليجو

ننڍن آبادگارن کي ڪڻڪ جو سرڪاري اگھ نھ پيو ڏنو وڃي: اياز لطيف پليجو

حيدرآباد (بيورو) قومي عوامي تحريڪ جي سربراھ اياز لطيف پليجي چيو آھي تہ ننڍن آبادگارن کي ڪڻڪ جو سرڪاري اگھ نہ پيو ڏنو وڃي. واپاري مافيا سستي اگھ تي ڪڻڪ خريد ڪري ھارين ۽ ننڍن آبادگارن جو معاشي قتل ڪري رھي آھي. پيپلز پارٽي سنڌ کي بک، بدحالي، ڌاڙيل راڄ، منشيات، ڪرپشن، ميرٽ جي لتاڙ ۽ لاقانونيت جي باھ ۾ اڇلائي ڇڏيو آھي. ڪرپٽ حڪمران نٿا چاهين تہ سنڌ ۾ ميرٽ ھجي، تعليم ۽ سائنس ھجي، روزگار ۽ خوشحال ھجي. پ پ حڪمرانن سنڌ جو ڪوئلو، گئس، ساحلي پٽي، ڪوھستان، ڪراچي سميت وڏن شھرن جون زمينون، ٻيٽ، ڪينجھر، ڪارونجھر، پاڻي ۽ ٻيا وسيلا چوٿون ڀيرو اقتدار ملڻ خاطر وڪڻي ڇڏيا آھن. اياز لطيف پليجي چيو سنڌ حڪومت سنڌي ماڻهن کي اصل مسئلن تان ڌيان ھٽائڻ لاءِ ڌاڙيل راڄ ۽ بدامني کي ختم نٿي ڪري. مھانگائي ذريعي عوام جو معاشي قتل ڪيو پيو وڃي. سنڌ حڪومت جا سمورا کاتا عوام آزار بنجي ويا آھن. اياز لطيف پليجي چيو تہ پيپلز پارٽي حڪومت سنڌ ۾ تعليم، صحت، روزگار، زراعت، صنعت، آئي ٽي ٽيڪنالاجي، خوشحالي ڏيڻ بدران سنڌ جي ماڻھن کي پينو فقيرن جو لشڪر بنائڻ چاھي ٿي. سنڌي ماڻھن ۾ پنھنجن بنيادي حقن لاءِ سياسي مزاحمت پيدا نہ ٿئي، جرئت نہ ٿئي، انھن جي اجتماعي آواز کي دٻائڻ ۽ اصل مسئلن تان ڌيان ھٽائڻ لاءِ ڌاڙيل ڪلچر کي مضبوط ۽ طاقتور ڪيو ويو آھي. اياز لطيف پليجي چيو تہ سنڌ جا ماڻھو حڪمرانن جي سازشن کي سمجھن ٿا. ڪيتريون بہ دھشتگرديون ڪيون وڃن، سنڌ جا ماڻھو پنھنجي حقن لاءِ خاموش نہ ويهندا. اھي پرامن مزاحمت لاءِ وڌي رھيا آھن.