جھوڪ شريف ۾ ڪجھ مھينا اڳ مبينه قتل ٿيل عورت جي قبر ڪشائي

جھوڪ شريف ۾ ڪجھ مھينا اڳ مبينه قتل ٿيل عورت جي قبر ڪشائي

سجاول (گلشيرميربحر ) جھوڪ شريف ۾ ڪجھ مھينا اڳ مبينه طور تي قتل ڪيل عورت جي قبر ڪشائي ڪئي وئي، قبر ڪشائي ڪندڙ ڪميٽيءَ کي عورت جي قتل بابت اھم شاھديون ھٿ اچي ويون. جوڊيشل مئجسٽريٽ ميرپور بٺورو جي حڪم تي ڪجھ مھينا اڳ جھوڪ شريف ۾ مبينہ طور قتل ٿيل عورت مسمات سويرا بنت صوفي غلام شبير جي قبر ڪشائي ڪئي. قبر ڪشائي جوڊيشل مئجسٽريٽ ميرپور بٺورو جي موجودگي ۾ ڪئي وئي. جڏهن ته ڪميٽي ۾ فارنزڪ ڊپارٽمنٽ جو اسسٽنٽ پروفيسر ڊاڪٽر واصق احمد، سجاول جي پوليس سرجن ڊاڪٽر مريم خواجه، ميڊيڪل آفيسر ڊاڪٽر گلزار سولنگي، ڊاڪٽر ڪنول، ڊاڪٽر پون ۽ ايڊيشنل پوليس سرجن ڊاڪٽر ڪامران شيخ شامل هئا. فارنزڪ ڪاميٽيءَ جي ذريعن مطابق مسمات سويرا تي سخت تشدد جون شاھديون مليون آھن ۽ سندس موت گلو دٻائي ساھ بند ڪرڻ سبب ٿيو آھي. جڏهن ته هن جون کاٻيون پاسراٽيون، نڪ جي ھڏي ۽ منھن جون ھڏيون ٽٽل مليون. ان کان علاوه مسمات سويرا جي دماغ ۾ ڌڪ لڳل ھئا ۽ کاٻي پير جون ھڏيون بہ ٽٽل ھيون. واضح رهي ته مسمات سويرا جي قتل جو ڪيس جھوڪ شريف ٿاڻي تي ايف آءِ آر نمبر 01/2024 قلم 302-34 پي پي سي تحت داخل ٿيل آھي ۽ مسمات سويرا جي قتل جي الزام ۾ سندس مڙس جوابدار صوفي غيور ۽ سس نگينه پهرين کان گرفتار ٿيل آھن.