نوان جتوئي ۾ اسڪول جي عمارت زبون حالي جو شڪار، ڇت جا چاپڙ ڪِرڻ سبب 3 ٻارڙا زخمي

31 views | 06th Mar 2024 • سنڌي خبرون

نوان جتوئي ۾ اسڪول جي عمارت زبون حالي جو شڪار، ڇت جا چاپڙ ڪِرڻ سبب 3 ٻارڙا زخمي

نوشهرو فيروز (ڊر) گورنمينٽ ھائير سيڪنڊري اسڪول نوان جتوئي جي عمارت جا چاپڙ اوچتو شاگردن مٿان ڪري پيا، چاپڙ ڪرڻ سبب 3 شاگرد زخمي ٿي پيا. زخمي شاگردن ۾ فرحان، مھربان ۽ سبحان شامل آھن ۽ انھن کي مٿي ۽ ٻانھن ۾ ڌڪ رسيا. زخمي ٻارڙن کي نوان جتوئي اسپتال ۾ فرسٽ ايڊ ڏني وئي. ٻڌايو پيو وڃي ته ھائير سيڪنڊري اسڪول نوان جتوئي جي عمارت جي ھڪ سڄي ونگ جنھن ۾ ڇھين کان اٺين ڪلاس تائين جا شاگرد پڙھن ٿا انھي سڄي ونگ جي عمارت انتھائي زبون ٿي وئي آھي جنھن ڪري حادثا ٿيڻ معمول جو حصو بڻجي ويا. عمارت کي ڏار پئجي ويا آھن ۽ ڇتين جا چاپڙ ھر وقت ڪرندا رھن ٿا جنھن ڪري اسڪول ۾ پڙھندڙ سوين شاگردن جون زندگيون خطري ھيٺ آھن. ان سلسلي ۾ اسڪول جي ھيڊ ماستر ٻڌايو ته ڇھين ڪلاس جا شاگرد صبح جو پڙھي رھيا ھئا ته ڇت جا چاپڙ اوچتو مٿان ڪري پيا. اسڪول جي ھڪ ونگ انتھائي زبون آھي ۽ عمارت زبون ھجڻ ڪري اڪثر واقعا ٿيندا رھن ٿا. ھن ٻڌايو ته اسڪول جي زبون حالت بابت اعلي اختيارين کي دانھيو آھي ان باوجود به ڪوبه تدارڪ نه ٿو ٿئي. ھن چيو ته زبون حالت بڻيل اسڪول جي عمارت کي ڊاھي ٻيھر تعمير ڪرايو وڃي