قومي عوامي تحريڪ جي سربراھھ اياز لطيف پليجي پاران چونڊ سرگرميون تيزي سان جاري

قومي عوامي تحريڪ جي سربراھھ اياز لطيف پليجي پاران چونڊ سرگرميون تيزي سان جاري

حيدرآباد (بيورو) قومي عوامي تحريڪ جي سربراھ ۽ پي ايس 60 قاسم آباد حيدرآباد جي اميدوار اياز لطيف پليجو جي اڳواڻي ۾ پونم پمپ کان سوين گاڏين جي ريلي ڪڍي وئي ريلي ۾ اديب دانشور ايڊووڪيٽ شھاب اوستو، انعام شيخ، صحافي امداد سومرو، اظھار سومرو، ڪاشف صديقي، جي يو آئي جي اڳواڻ مولانا اعظم جھانگيري سوين سنڌياڻين سميت ھزارين ماڻھن شرڪت ڪئي، ريلي جي وک وک تي گلن جي ورکا ڪري شاندار استقبال ڪيا ويا. ريلي پي ايس 60 قاسم آباد جي مختلف علائقن قاسم چوڪ، سينٽر جيل ھٽڙي باء پاس،نيوسٽي، گيلو نوناري، واڻڪي وسي،مسو ڀرڳڙي ،طالب المولا ڪالوني، مسو ڇلگري، ھٽڙي، درياھ بيگ، مغل، باگراڻي ڳوٺ، ھنڊاپيلس، ماري ٽائون ،ڀٽائي ٽائون، گلستان سجاد، سٽيزن ڪالوني، علمدار چوڪ، نسيم نگر، واڌو واھ گيٽ، علي پيلس روڊ، سحرش نگر، پٺاڻ ڳوٺ ،گدو چوڪ، وحدت ڪالوني، سئي گيس آفيس کان ٿيندي پڪوڙا چوڪ قاسم آباد جلسي جي شڪل اختيار ڪري وئي. ان موقعي تي قومي عوامي تحريڪ جي سربراھ پي ايس 60 قاسم آباد جي اميدوار اياز لطيف پليجي خطاب ڪندي چيو تہ 8 فيبروري تي ڄام خان شورو، پيپلز پارٽي ۽ زرداري ٽولي جي ڪرپشن جو سج لھي ويندو. ھاڻ پي ايس 60 تڪ قاسم آباد سميت سنڌ جو ست ڪروڙ عوام تبديلي چاھي ٿو. 2013 ۽ 2018 جي اليڪشن ۾ قاسم آباد جي عوام جي مينڊيٽ تي پيپلزپارٽي ۽ آصف زرداري ڌاڙا ھڻي جعلسازي سان اسان جا نتيجا تبديل ڪيا، ھن ڀيري ڌانڌلي ھلڻ نہ ڏني ويندي. 8 فيبروري تي ڪامياب ٿي سڄي سنڌ ۾ جشن ملھائينداسين ۽ امن، انصاف، برابري، تعليم ۽ صحت لاء ڪم ڪنداسين. نوجوانن کي تعليم ۽ روزگار ڏنو ويندو. زراعت کي بحال ڪري بک، بيروزگاري جو خاتمو آڻينداسين. اياز لطيف پليجي چيو تہ 8 فيبروري تي تاري تي ٺپو هڻي سنڌ جي خوشحالي ميرٽ، امن،انصاف ،حق ۽ سچ جو ڏينهن ثابت ڪندا. پيپلزپارٽي ۽ زرداري ٽولي گذريل ٻوڏ ۾ سنڌ سرڪار هٿ وٺي ٻہ ڪروڙ ماڻهن کي ٻوڙي دربدر ڪيو، شهرن جا شهر ٻوڙايا ويا، اڄ ڏينهن تائين ٻوڏ متاثرن جي ڪابہ واهر نہ آهي. پيپلز پارٽي پنهنجي گذريل حڪومتي دور دوران سنڌ کي عوام کي بک، بدحالي، بيروزگاري، بدامني ۽ لاقانونيت کان سواءِ ڪجھ نہ ڏنو.اياز لطيف پليجي چيو تہ سنڌ کي ھٿ وٺي تباھ ۽ برباد ڪيو ويو آھي. پيپلز پارٽي چاھي ھا تہ 15 سالن ۾ سنڌ مان غربت، بک بدحالي ۽ بيروزگاري ختم تي وڃي ھا پر ڪرپٽ وزير تعليم، صحت، زراعت سميت ھر کاتي کي لٽي کرب پتي تي ويا آھن. ڪرپشن ذريعي کٽيل دولت ٻاھرين ملڪن ۾ منتقل ڪئي وئي آھي.