موھن جو دڙو ڀرسان ڳوٺ سونھارو گاڏجي جي رھواسين جو احتجاجي مظاھرو

161 views | 16th Jan 2024 • سنڌي خبرون

موھن جو دڙو ڀرسان ڳوٺ سونھارو گاڏجي جي رھواسين جو احتجاجي مظاھرو

موهن جو دڙو(معشوق مشوري) موهن جو دڙو ڀرسان ڳوٺ سونهارو گاڏهي جي ڳوٺاڻن حبدار علي، محمد عمر،عابد علي، نظير، امتياز گاڏي ۽ ٻين ڳوٺاڻن موهن جو دڙو پريس ڪلب اڳيان احتجاج ڪندي چيو آهي تہ 12 جوابدارن مور، عبدالحڪيم اقبال گاڏهي ۽ ٻيا ڏنڊا کڻي هنن مٿان حملو ڪيو ۽ ڳوٺاڻي محمد عمر جو ڪچو گهر ڊاهي ڇڏيو. جنهن دوران هڪ ٻڍڙي عورت مسمات سائنڻ زال عمر گاڏهي حملو ڪندڙ جوابدار کي ايلاز ڪندي رھي پر اھي کيس ڌڪا ڏيندا رھيا احتجاج ڪندڙ ڳوٺاڻن ڳوٺ جي چڱن تي بہ الزام هنيو تہ حملو ڪندڙ جوابدارن کي ڳوٺ جا چڱا مڙس ٽيڪ ڀرائي رهيا آهن. جنهن ڪري هو ظلم تي لهي آيا آهن. هنن چيو تہ جوابدار سندن گهر ڊاهي اتي زمين آباد ڪرڻ چاهن ٿا. هنن چيو تہ جوابدار کين موتمار ڌمڪيون ڏئي رهيا آهن. ڳوٺاڻن چيو تہ هنن اهڙو اطلاع ويهڙ پوليس کي ڏنو آهي. جنهن تي ويهڙ پوليس جاء واردات جو معائنو ڪيو. هنن وس وارن کان گهر ڪئي آهي تہ جوابدارن کي گرفتار ڪري ساڻن انصاف ڪيو وڃي. هوڏانهن رابطو ڪرڻ تي ايس ايڇ او ويهڙ علي حسن ابڙو ٻڌايو تہ جوابدارن خلاف متاثر ڳوٺاڻن جي اين سي داخل آهي سندن خلاف قانوني ڪاروائي ڪئي ويندي. هن چيو تہ هن مٿان هٿياربندن جي مدد ڪرڻ جو الزام غلط آهي.