سجاول ۾ ڊي سي جي اڳواڻي ۾ ڪرپشن بابت آگاھي ريلي ڪڍي وئي

سجاول ۾ ڊي سي جي اڳواڻي ۾ ڪرپشن بابت آگاھي ريلي ڪڍي وئي

سجاول (گلشيرميربحر)ڪرپشن هڪ ناسور آهي جنهن جون پاڙون پٽڻ لاءِ هر فرد کي پنھنجو ڀرپور ڪردار ادا ڪرڻو پوندو,مُلڪ جي ترقي ۾ سڀ کان وڏي رڪاوٽ ڪرپشن آهي جنهن جو خاتمو وقت جي اھم ضرورت آهي. ڊپٽي ڪمشنر سجاول ,ڊپٽي ڪمشنر عبدالواجد شيخ چيو آھي ته ڪرپشن هڪ ناسور آهي جنهن جون پاڙون پٽڻ لاءِ هر فرد کي پنھنجو ڀرپور ڪردار ادا ڪرڻو پوندو ته جئين ايندڙ نسلن کي ڪرپشن کان پاڪ معاشرو ملي سگهي. اھڙين ڳالھين جو اظھار ھنن ڪرپشن جي خاتمي واري عالمي ڏينهن جي موقعي تي ضلعي انتظاميه سجاول پاران عوام ۾ ڪرپشن بابت آگاهي ۽ شعور پيدا ڪرڻ لاءِ ڊپٽي ڪمشنر آفيس کان نڪتل هڪ شاندار ريلي جي قيادت بعد ميڊيا جي نمائندن سان ڳالھائيندي ڪيو. هنن چيو ته پاڪستان جي ترقي ۽ خوشحالي جو راز به ڪرپشن کان پاڪ معاشري ۾ آهي، ڪرپشن هڪ سماجي ظلم آهي جنهن جي سزا دنيا ۽ آخرت ٻنهي ۾ آهي، ڪرپشن اسان جي ادارن ۽ مُلڪ جي ترقي ۾ سڀ کان وڏي رڪاوٽ آهي جنهن جو خاتمو وقت جي اھم ضرورت آهي. ھنن چيو تہ هن ڏينهن کي ملهائڻ جو مقصد بدعنواني ۽ ڪرپشن جي نقصانن بابت عوام ۾ آگاهي ۽ شعور پيدا ڪرڻ آهي. ريلي ۾ ايس ايس پي شھلا قريشي ۽ سرڪل آفيسر اينٽي ڪرپشن اڪرام علي مغيري سميت روينيو، تعليم، صحت، پوليس، لوڪل گورنمينٽ، سوشل ويلفيئر ۽ ٻين مختلف کاتن جي عملدارن ۽ عملي، مختلف سماجي تنظيمن جي نمائندن ۽ زندگي جي مختلف شعبن سان تعلق رکندڙ ماڻهن وڏي تعداد ۾ شرڪت ڪئي.