افغانين سميت سمورا غير قانوني پرڏيھي ملڪ جي امن ۽ سلامتي لاءِ خطرو آھن: اياز لطيف پليجو

افغانين سميت سمورا غير قانوني پرڏيھي ملڪ جي امن ۽ سلامتي لاءِ خطرو آھن: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو تہ غير قانوني افغانين سميت سمورا غير قانوني پرڏيھي ملڪ جي امن ۽ سلامتي لاءِ وڏو خطرو آھن، انھن کي نيڪالي ڏيڻ لاءِ سخت آپريشن ڪيو وڃي. نادرا جي ڪرپٽ عملدارن ۽ بلدياتي نمائندن رشوت وٺي غير قانوني رھائشي سرٽيفڪيٽ ۽ ٻيا ڪاغذ ٺاھي ڏنا آھن، انھن ملوث ماڻھن خلاف ڪيس داخل ڪري کين گرفتار ڪيو وڃي.اياز لطيف پليجي چيو تہ پيپلز پارٽي، جماعت اسلامي ۽ پي ٽي ايم اقتدار ۽ ووٽ جي لالچ ۾ ملڪ جي امن ۽ سلامتي کي خطري ۾ نہ وجھن ۽ سنڌي ماڻھن کي پنھنجي وطن ۾ اقليت ۾ تبديل ڪرڻ جي سازش جو حصو نہ ٿين. افغانستان ۾ ھن وقت امن آھي، اتي جون معاشي حالتون پاڪستان کان وڌيڪ بھتر تي رھيون آھن، انڪري انھن کي ھتي رھائڻ جو ڪو بہ جواز نٿو بچي. اياز لطيف پليجي چيو تہ ڪراچي، حيدرآباد ۽ سکر سميت سمورن وڏن شھرن ۾ غير قانوني افغاني ۽ ٻيا غير قانوني پرڏيھي ڪالونيون ٺاھي قابض ويٺل آھن، اھي غير قانوني پرڏيھي سنڌ جي روزگار جي وسيلن تي قابض آھن، اھي دھشتگردي جي واقعن ۾ استعمال ٿين ٿا، سنڌ جي خوراڪ، پاڻي، ٽرانسپورٽ ۽ ٻيا وسيلا استعمال ڪن ٿا، اھي غير قانوني پرڏيھي سنڌ جي ماڻھن جي حقن تي ڌاڙا ھڻي رھيا آھن، سنڌي ماڻھن کي اقليت ۾ تبديل ڪري رھيا آھن.اياز لطيف پليجي چيو تہ سڄي دنيا ۾ ڪٿي بہ غير قانوني پرڏيھين جو تحفظ ناھي ڪيو ويندو. ھر ملڪ کي پنھنجا مفاد عزيز آھن، پنھنجي ملڪ جي ماڻھن جا مفاد عزيز آھن پر پاڪستان ۾ ملڪ دشمن ۽ سنڌ دشمن سازشن کي ھٿي ڏني وڃي ٿي.