سجاول (گلشيرميربحر) ڊپٽي ڪمشنر عبدالواجد شيخ چيو آهي ته ڪنهن به ملڪ جي ترقي لاءِ تعليمي نظام جو جديد دور جي مطابق ھجڻ لازم ۽ ملظوم آهي ، ھڪ طالب علم جي معاشري ۾ انفرادي ترقي لاءِ کيس جديد تعليم سان روشناس ڪرائڻ طالب علم کي ملڪي ۽ بين الاقوامي معيار مطابق ترقي ڪرڻ جي قابل بڻائي ٿو - اھڙن خيالن جو اظهار ھن گورنمينٽ گرلز ھاء اسڪول سجاول ۾ ڊسٽرڪٽ اي ڊي پي اسڪيم تحت تعليمي ادارن کي سائنسي اوزار فراھم ڪرڻ واري منعقد تقريب کي خطاب ڪندي ڪيو - ڊپٽي ڪمشنر جو چوڻ ھو ته جديد ٽيڪنالاجي سان شاگردن ۽ شاگردياڻين ۾ معلومات جي حصول لاءِ دلچسپي پيدا ٿيندي آهي ، تعليم ۾ جديد ٽيڪنالاجي جي استعمال جو مقصد جديد تعليم کي ھٿي ڏيارڻ آهي - ھن چيو ته موجوده دور ۾ وڌ کان وڌ تعليمي ڪم ٽيڪنالاجي تي ئي منحصر ڪري ٿو ، ان لاءِ شاگردن ۽ شاگردياڻين کي کپي ته هو موجوده دور جي تقاضي مطابق جديد تعليم ۽ ٽيڪنالوجي تي عبور حاصل ڪرڻ لاءِ دلچسپي سان گڏوگڏ محنت ڪن ته جيئن ھو اڳيان ھلي پنهنجي ملڪ ۽ قوم جو نالو روشن ڪري سگھن - ھن چيو ته ضلعي جي تعليمي ادارن م بنيادي سھولتن جي فراهمي لاءِ ھر وقت ڪوششون ورتيون پيون وڃن - ان موقعي تي ڊپٽي ڪمشنر گورنمينٽ گرلز ھاء اسڪول سجاول ، مير پور بٺورو ، جاتي ۽ گورنمينٽ گرلز ھاء اسڪول چوھڙ جمالي جي انتظاميه ۾ ليپ ٽاپ ، ملٽي ميڊيا ، ڪيمسٽري ، باٽني ، زولاجي ، فزڪس ، مائڪرو اسڪوپ ، سمارٽ بورڊ ۽ ٻيا سائنسي اوزار ورھايا - تقريب ۾ ھيڊ ماسٽر نصير احمد ميمڻ ، ھيڊ مسٽريس گورنمينٽ گرلز ھاء اسڪول ميرپور بٺورو آپا فرزانه ۽ ٻيا استاد ۽ عملدارن شرڪت ڪئي - بعد ۾ ڊپٽي ڪمشنر عبدالواجد شيخ گورنمينٽ گرلز ووڪيشنل سينٽر سجاول ۾ عورتن کي سلائي مشينون ، ٽيبلون ، ڪينچيون ، استريون ۽ ٻيو لاڳاپيل سامان پڻ ورھايو - ان کان علاوه ھن گورنمينٽ بوائز ھاء اسڪول سجاول پھچي سجاول ، لاڏيون ، چوھڙ جمالي ، ميرپور بٺورو ۽ جاتي جي گورنمينٽ بوائز ھاء اسڪول انتظاميه ۾ پڻ اسڪولن لاءِ سائنسي اوزار ورھايا - ان موقعي تي ڊسٽرڪٽ ايجوڪيشن آفيسر سيڪينڊري پيار علي خواجه ، ڊسٽرڪٽ ايجوڪيشن آفيسر پرائمري عنايت کٽي ، ڊي ڊي اي او اشرف شاعر ، ھيڊ ماسٽرز طفيل احمد ، ھارون چاوڙو ۽ ٻيا استاد پڻ موجود هئا - بعد ۾ ڊپٽي ڪمشنر عبدالواجد شيخ گورنمينٽ پرائمري اسڪول بھاول خان مگسي جو دورو ڪري اسڪول جي احاطي م جمع ٿيل ڊرينيج جو پاڻي ۽ عمارت جو معائنو ڪيو - ان موقعي تي ھن ايجوڪيشن ورڪس ۽ ٻين لاڳاپيل عملدارن کي ھدايت ڪئي ته اسڪول جي ڪمرن جي مرمت ، سولر سسٽم لڳائڻ سميت پاڻيءَ جي نيڪال کي جلد يقيني بڻايو وڃي ته جيئن سردي جي موسم ۾ شاگردن کي ڪنهن به قسم جي پريشاني کي منهن ڏيڻو نه پوي –
0 تبصرے