ملير ۾ ايس ٽي پي پاران شھداءِ سنڌ جلوس منعقد، گلزار سومرو، حميدھ گھانگھرو ۽ ٻيا شريڪ

سنڌ جي عزت، آجپي، خوشحالي ۽ بقا خاطر ويڙهه ڪندي شهادت جو جام پيئندڙ سڀ اسان جا شهيد ۽ هيرو آهن: اڳواڻ

ملير (ڊ ر) سنڌ ترقي پسند پارٽي پاران ملير پريس ڪلب آڏو يوم شهداءَ سنڌ جلسو منعقد ڪيو ويو، جلسي ۾ ڪارڪنن جي وڏي انگ ۾ شرڪت ڪئي. تقريب ۾ مرڪزي وائيس چيئرمين گلزار سومرو، حميده گهانگهرو، ماما رحيم بلوچ، حيات تنيو، شبير چانڊيو، نصرت سومرو، نادر مگسي سميت ٻين اڳواڻن جي شرڪت ڪئي. جلسي کي خطاب ڪندي مرڪزي وائيس چيئرمين گلزار سومرو چيو ته مادر وطن سنڌ جي عزت، آجپي، خوشحالي ۽ بقا خاطر ويڙهه ڪندي جن به شهيدن شهادت جو جام پيتو آهي اهي سمورا اسان جا شهيد ۽ هيرو آهن جن کي ياد ڪرڻ لاءِ سنڌ ترقي پسند پارٽي هر سال يوم شهداءَ ڏهاڙو ملهائي کين خراج تحسين پيش ڪندي آهي هن چيو ته سنڌ هن وقت ڏکي دور مان گذري رهي آهي جنهن لاءِ ٻڌي جي ضرورت آهي هن چيو ته پيپلزپارٽي گذريل 15 سالن کان سنڌ ۾ ڦرلٽ جو راڄ قائم ڪري سنڌ کي تباهه ڪيو آهي اڃا به وڌيڪ تباهي لاءِ سانباها ڪري رهيا آهن هن چيو ته هن ملڪ ۾ سنڌي قوم ان آس تي شامل ٿي هئي ته اسان کي پنهنجا حق ملندا پر ملڪ جي ٺهڻ سان حق ملڻ ته پري جي ڳالهه رهي پر سنڌ جي وسيلن تي قبضن جو سلسلو شروع ٿي ويو ۽ ڌرتي ڌڻين سان ٻه اکيائي وارو سلوڪ روا رکيو ويو سنڌ جي وسيلن تي قبضا ڪيا ويا هن ملڪ ۾ جيڪڏهن ڪير حق جي ڳالهه ڪري پيو ته انهن لاءِ جيلن جا در کوليا پيا وڃن يا انهن کي شهادتون نصيب ٿيون اهڙي طرح مادر وطن جي حقن جي حاصلات لاءِ قربانيون ڏيندڙن جي وڏي لسٽ آهي. سنڌ ترقي پسند پارٽي سرواڻ ڊاڪٽر قادر مگسي جي قيادت ۾ پنهنجي شهيدن کي ڀيٽا پيش ڪري رهي آهي هن چيو ته اسرائيل پاران فلسطين مٿان ٿيل حملي ۽ دهشتگردي جي سخت لفظن ۾ مذمت ڪيون ٿا اسرائيل هزارين فلسطينين مردن، عورتن ۽ ٻارڙن جي قتل ۾ ملوث ۽ عالمي دهشت گرد آهي اسرائيل جي اهڙي عمل سان دنيا اندر دهشتگردي کي هٿي ملندي. تقريب ۾ حميده گهانگهرو، ماما رحيم بلوچ، حيات تنيو، شبير چانڊيو، نصرت سومرو، نادر مگسي، صدا بليدي، گل ملاح ۽ ٻين پڻ خطاب ڪيو.