اياز لطيف پليجي سان صفدر عباسي ۽ ناھيد خان جي ملاقات

سنڌ ۽ پاڪستان کي 75 سالن کان مسلسل تباھ ڪيو پيو وڃي: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجو سان گرينڊ ڊيموڪريٽڪ الائينس جي جنرل سيڪريٽري صفدر عباسي ۽ ناهيد خان حيدرآباد ۾ قاسم آباد پرنس ٽائون ۾ سندس رھائشگاھ تي ملاقات ڪئي. ان موقعي تي ملڪ، سنڌ ۽ موجوده عالمي صورتحال جي صورتحال تي تفصيلي ڳالھ ٻولھ ڪئي. ان موقعي تي ڳالهائيندي اياز لطيف پليجي چيو تہ سنڌ ۽ پاڪستان کي 75 سالن کان مسلسل تباھ ڪيو پيو وڃي، سنڌ ۾ ڌارين جي آبادڪاري جي سخت مزاحمت ڪنداسين، ڪرپٽ حڪمران دولت ٺاهڻ ۾ مصروف آهن.پيپلز پارٽي ۽ وفاق سنڌ جي غربت ۽ تباهي کان لاتعلق آهن. سنڌ جا ادارا تباھ آھن، ڳوٺ فقير ۽ شهر گندگي جو ڍير بڻجي ويا آهن. اياز لطيف پليجي چيو تہ سمورن ڪرپٽ آفيسرن، وزيرن ۽ سياستدانن کي گرفتار ڪيو وڃي. ادارا ۽ عدليا سنڌ جي ڪرپشن ۽ تباهي کان لاتعلق آهن، ڊجيٽل مردم شماري رد ڪريون ٿا. سنڌ جعلسازي ڪئي وئي آهي. ڊاڪٽر صفدر عباسي ۽ ناھيد خان چيو تہ اسين قومي عوامي تحريڪ کي 8 آڪٽوبر تي ڪامياب جلسه عام تي مبارڪباد پيش ڪريون ٿا، جي ڊي اي ڪرپشن خلاف ڪردار ادا ڪندي. 2018 جي اليڪشن ۾ سنڌ ۾ وڏي ڌانڌلي ڪئي وئي، اسين ملڪ ۾ ميرٽ، احتساب، امن ۽ برابري چاهيون ٿا. نگران حڪومت جي نالي تي سنڌ ۾ پيپلز پارٽي جي حڪومت جاري آهي، سنڌ ۾ پاڻي، ميونسپل ۽ ڊرينيج جا سمورا ادارا ناڪام ٿي ويا آهن. ڊاڪٽر صفدر عباسي ۽ ناھيد خان چيو تہ سنڌ کي سرداري نظام ۽ وڏيرا شاهي جو مرڪز بڻايو ويو آهي. خراب حڪمراني ۽ ڪرپشن خلاف گڏجي وڙهندا. عدالتن کي گهرجي تہ سنڌ جي ترقياتي منصوبن ۾ لٽ مار جو حساب وٺن، جي ڊي اي ڪرپشن خلاف ڪردار ادا ڪندي. 2018 جي اليڪشن ۾ سنڌ ۾ وڏي ڌانڌلي ڪئي وئي.