سنڌ جي ايڪسائيز کاتي کي گاڏين جون نمبر پليٽون جاري ڪرڻ ۾ تيزي ڏيکارڻ جي هدايت

118 views | 05th Sep 2023 • سنڌي خبرون

گاڏين جي نمبر پليٽن واري طريقيڪار بهتر بڻايو وڃي ۽ عوام کي سهولتون فراهم ڪن: محتسب اعليٰ سنڌ جا حڪم

ڪراچي (اسٽاف رپورٽر) محتسب اعليٰ سنڌ اعجاز علي خان ايڪسائيز اينڊ ٽيڪسيشن کاتي کي حڪم جاري ڪندي چيو ته گاڏين جي نمبر پليٽن جي فوري جاري ڪرڻ کي يقيني بڻايو وڃي ۽ عوام کي سهولتون فراهم ڪرڻ لاءِ گهربل طريقيڪار اختيار ڪيا وڃن. مٿي ڄاڻايل حڪمن تحت محتسب اعليٰ سنڌ ايڪسائيز اينڊ ٽيڪسيشن کاتي جي سيڪريٽري کي 3 لک کان وڌيڪ گاڏين جي نمبر پليٽس جاري نه ڪرڻ تي پاڻمرادو نوٽيس جي ڪارروائي جي دوران جاري ڪيا. سيڪريٽري ايڪسائيز اينڊ ٽيڪسيشن کاتو سنڌ عاطف الرحمان محتسب اعليٰ سنڌ کي پيش ڪيل پنهنجي پريزنٽيشن ۾ جاري نه ٿيل نمبر پليٽس جي پوئتي پيل سببن ۽ صورتحال کي بهتر بڻائڻ لاءِ کنيل قدمن جي وضاحت ڪئي. محتسب اعليٰ سنڌ سيڪريٽري ايڪسائيز کي حڪم جاري ڪندي چيو ته مالڪن کي پوسٽ ذريعي نمبر پليٽ فراهم ڪرڻ جي فزيبلٽي جو جائزو وٺن ۽ عوام کي سهولتون فراهم ڪرڻ لاءِ قدم کنيا وڃن. محتسب اعليٰ سنڌ وڌيڪ چيو ته ته بائيو ميٽرڪ ۽ لاڳاپيل سهولتن لاءِ سسٽم کي نادرا سان گڏ ملائڻ تي وڌيڪ غور ڪيو وڃي، محتسب اعليٰ سنڌ وڌيڪ هدايتون ڪيون ته مختلف جڳهن تي ڊيسڪ/ون ونڊو آپريشن جو جائزو پڻ وٺن. جنهن ۾ رجسٽرڊ موٽر ڊيلرز به شامل آهن ته جيئن شڪايتن جو ازالو ڪري انهن کي سسٽم ۾ آڻي سگهجي ۽ کاتو انهن مسئلن تي هڪ مهيني ۾ پنهنجي رپورٽ پيش ڪن.ان موقعي تي ناظم حاجي (باني ۽ چيئرمين سي پي ايل سي) گڏيل عرب امارات سان زوم اجلاس ۾ شرڪت پڻ ڪئي ۽ پنهنجون تجويزون پيش ڪيون.