مغوين جي بازيابي تائين مظاهرين کي ڪشمور وارو ڌرڻو ختم نه ڪرڻ گهرجي: اياز لطيف پليجو

ڌاڙيلن اڳيان بيوس بڻيل پوليس ڌرڻو ھڻي ويٺل شھرين ۽ مغوين جي وارثن کي ڌمڪيون ڏيڻ کان پاسو ڪري

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ مغوي جگديش ڪمار، ڊاڪٽر منير احمد نائچ، ساگر ڪمار، معصوم پريا ڪماري، جئديپ ڪمار ۽ ٻين مغوين کي فوري طور بازياب ڪرايو وڃي. ڌاڙيلن اڳيان بيوس بڻيل پوليس ڌرڻو ھڻي ويٺل شھرين ۽ مغوين جي وارثن کي ڌمڪيون نہ ڏئي. لاڙڪاڻو ۽ سکر ڊويزن ڌاڙيلن، جرڳائي سردارن ۽ وڏيرن جي رحم ۽ ڪرم تي آھن. اياز لطيف پليجي چيو تہ ھٿ وٺي ڏوھارين کي طاقتور ڪيو ويو آھي. ڪنھن سردار، وڏيري ۽ جاگيردار کي اغوا نٿو ڪيو وڃي. پورھيت، معصوم ٻار ۽ ننڍو ڪاروبار ڪندڙن کي اغوا ڪيو وڃي ٿو ۽ پوء لکين روپيا ڀنگ طلب ڪئي وڃي ٿو. اياز لطيف پليجي چيو تہ پوليس رڳو غريب ماڻھن کي تنگ ڪري ٿي. پوليس جي سرپرستي ۾ منشيات جو ڪاروبار ھلي رھيو آھي. پوليس ڏوھن کي روڪڻ ۾ مڪمل ناڪام وڃي چڪي آھي. حڪومت چاھي تہ ڌاڙيل راڄ ختم ٿي سگھي ٿو پر ھٿ وٺي ڏوھن کي ختم نٿو ڪيو وڃي. اياز لطيف پليجي مغوين جي بازيابي لاءِ ڌرڻو ھڻي ويٺلن سان مخاطب ٿيندي چيو تہ عوام ئي وڏي طاقت آھي. عوام چاھي تہ حڪمرانن جا تختا اونڌا ٿي وڃن. انڪري ثابت قدم رھي مغوين کي بازياب ڪرائي سگھجي ٿو. مغوين جي بازيابيءَ تائين ڪنھن بہ صورت ۾ ڌرڻو ختم نہ ڪيو وڃي. ثابت قدم جدوجھد رنگ لائيندي.