15سالن دوران غربت سبب مائرون پنھنجا ٻچا وڪڻڻ تي مجبور ٿيون: اياز لطيف پليجو

گذريل 15سال سنڌ ۾ ڪرپشن، مھانگائي، بک، بدحالي، بيروزگاري ۽ زرعي تباھي وارا رھيا

حيدرآباد(بيورو) قومي عوامي تحريڪ جي سربراھ اياز لطيف پليجي چيو آهي تہ پيپلز پارٽي حڪومت جا 15 سال سنڌ ۾ بي پناھ ڪرپشن، مھانگائي، بک، برحالي، بيروزگاري ۽ زرعي تباھي وارا رھيا. غربت سبب مائرون پنھنجا ٻچا وڪڻڻ تي مجبور ٿيون، بک کان بيزار ٿي نوجوانن خودڪشيون ڪيون. ڌاڙيلن معصوم ٻارن سميت نوجوانن کي اغوا ڪيو، جن مان ڪيترائي اڃا تائين بازياب نہ ٿي سگھيا آھن ۽ يرغمال آھن. ڪاروڪاري ۾ عورتون قتل ڪيون ويون. نياڻيون اغوا ڪري زبردستي مذھب تبديل ڪيا ويا. زراعت کي ھٿ وٺي تباھ ڪري آبادگارن ۽ ھارين جو معاشي قتل ڪيو ويو. وزيرن، ايم پي ايز ۽ ايم اين ايز ۽ وڏيرن پاڻي کي مخالف آبادگارن خلاف ھٿيار طور استعمال ڪيو. ڪا نئين انڊسٽري قائم نہ ٿي سگھي، ڪراچي، ڪوھستان، ساحلي پٽي ۽ ٻين وڏن شھرن جي لکين ايڪڙ زمين بلڊر مافيا کي ڏني وئي. ھٿرادو پاڻي کوٽ ڪري فصل سڪايا ويا. جيڪي فصل مارڪيٽ ۾ آيا، انھن جو ھٿرادو اگھ ڪيرايو ويو. اياز لطيف پليجي چيو تہ پيپلز پارٽي سنڌين کان حق حاڪميت کسڻ ۽ سنڌي ماڻھن کي اقليت ۾ تبديل ڪرڻ لاءِ غير قانوني افغاني ۽ ٻين غير قانوني پرڏيھين کي تحفظ ڏنو ۽ جيڪو بہ ڪٿي صرف 6 مھينا اچي رھي تہ ان کي اتي جو ڊوميسائيل ڏيڻ جو بل اسيمبلي ۾ آندو. سنڌ ۾ مھا ٻوڏن سبب تباھ ٿيل لکين متاثرن کي ڪراچي ۾ رھائڻ ۽ روزگار ڏيڻ بدران انھن کي پنھنجي ئي وطن ۾ بي وطن ڪيو. اياز لطيف پليجي چيو تہ پيپلز پارٽي اقتدار خاطر سنڌ ورھائڻ ۾ سھولتڪار ٿي. ھنن ٻٽو نظام آڻي سنڌ کي ورھايو. ھنن ڪوڙي ڊجيٽل آدمشماري ڪري سنڌ کي ڪاپاري نقصان ڏنو ۽ 8 ڪروڙ آبادي کي گھٽائي ساڍا 5 ڪروڙ 57 لک آبادي کي قبول ڪيو، سنڌ جي ثقافتي ورثي ڪارونجهر کي قتل ڪرڻ لاءِ ٽينڊر جاري ڪيو. اياز لطيف پليجي چيو تہ سنڌ جو تيل، گئس، ڪوئلو ۽ ٻيا وسيلا وفاق کي ڏنا ويا. ڪا نئين يونيورسٽي يا اسپتال قائم نہ ٿي سگھي. صحت، تعليم سميت مختلف شعبا ڪرپشن جو ڳڙھ بنجي ويا. اياز لطيف پليجي چيو تہ سنڌ جو عوام ايندڙ اليڪشن ۾ پيپلز پارٽي جي سنڌ دشمن ڪردار کي رد ڪري. سنڌ کي ترقي يافتہ خوشحال ڏسڻ جا خواب ڏسندڙ ماڻھو ڪرپٽ نمائندن سان مقابلو ڪن. سنڌ جا وسيلا سنڌ جي ماڻھن جا آھن. اسين اھڙي سنڌ چاھيون ٿا جنھن ۾ برابري ھجي. عورت کي آزادي ھجي. نوجوانن کي اعلي تعليم ۽ روزگار جا موقعا ھجن. اسپتالون ڪوس گھر بدران بھتر علاج جو مرڪز ھجن. ڌاڙيل راڄ بدران امن ھجي. جرڳن بدران قانون ۽ انصاف جي حڪمراني ھجي. ڪا به نياڻي اغوا ڪري ان جو زبردستي مذھب تبديل نہ ڪيو وڃي. سنڌ کي پنھنجي حصي جو پاڻي ملي ۽ زمينون آباد ھجن.