صوبي ۾ ڪرپشن ۽ ڪارڪردگي خلاف جماعت اسلامي وائيٽ پيپر جاري ڪندي: محمد حسين محنتي

views | 06th Aug 2023 • سنڌي خبرون

گورک ھل کان وٺي ڪارونجهر تائين پ پ سنڌ جي وسيلن جي ڀيل ۽ تباھي بربادي کان سواءِ ڪجهه بہ ناھي ڏنو

ڪراچي(اسٽاف رپورٽر) جماعت اسلامي سنڌ جي امير اڳوڻي ايم اين اي محمدحسين محنتي سنڌ جي خوشحالي توڙي عوامي مسئلن جو واحد حل پ پ کان نجات قرار ڏيندي چيو آھي تو گورک ھل کان وٺي ڪارونجهر تائين پ پ سنڌ جي وسيلن جي ڀيل ۽ تباھي بربادي کان سواءِ ڪجهه بہ ناھي ڏنو . پ پ جي ڪرپشن ۽ ڪارڪردگي خلاف جماعت اسلامي جلد وائيٽ پيپر جاري ڪندي . ظالم وڏيري شاھي نظام سڄي سنڌ ۽ عوام کي يرغمال بڻائي ڇڏيو آھي انڪري نظام ۽ قيادت جي تبديلي ۽ ملڪ ۾ قرآن ۽ سنت جي نفاذ کانسواءِ عوام جي تقدير نہ ٿي بدلجي سگهي . اھڙن خيالن جو اظھار ھن قباء آڊيٽوريم ۾ جماعت اسلامي سنڌ جي مجلس شوريٰ کي خطاب دوران ڪيو. اجلاس ۾ سنڌ جي سياسي توڙي تنظيمي صورتحال تي غور سالياني بجيٽ جي منظوري سميت امن ، امان ، مھانگائي ، ڌاڙيل راڄ پ پ جي ڪارونجهر دشمني تي ٺھراءُ منظور ڪياويا. سنڌ جي امير جو وڌيڪ چوڻ ھو تہ پ پ عوامي يا جمھوري جماعت نہ پر مينڊيٽ چور پارٽي آھي . جيڪا ھميشہ انتظامي مشينري ، طاقت ۽ ڌانڌلي ذريعي چونڊون کٽيندي آھي. جنھن جي ھڪ جهلڪ ڪراچي ميئرجي چونڊ ۾ سڄي قوم ڏسي چڪي آھي. ھن چيو تہ جماعت اسلامي چونڊن ذريعي ملڪ ۾ تبديليءَ تي يقين رکي ٿي . چونڊن جي ڀرپور تيارين سان گڏ ھڪ ميمبر تي گهٽ ۾ گهٽ 20 ھزار رپيا اليڪشن فنڊ پڻ رکيو ويو آھي . ان موقعي تي مجلس شوريٰ جي ميمبرن محمد يوسف چانڊيو نيو ڪراچي، نصرت اللہ گلبرگ ، عبدالجمل ڪورنگي ۽ ڊاڪٽر فواد احمد کي گلشن ٽائون جو ناظم ٿيڻ تي مبارڪباد ۽ سنڌ جي سوکڙي اجرڪ پارايا ويا.