گڏاپ ۾ ڌارين جي نيڪالي لاءِ ايس اين پي پاران احتجاجي ريلي ڪڍي وئي

هڪ سازش تحت سنڌين کي اقليت ۾ تبديل ڪرڻ لاءِ ڌارين کي آباد ڪيو پيو وڃي: رمضان بليدي ۽ ٻيا

گڏاپ(رپورٽر)ڪراچي افغانين جي آبادڪاري خلاف ۽ غير قانوني پرڏيھين جي نيڪالي لاءِ سنڌ نيشنل پارٽي پاران ايس اين پي ھائوس سھراب گوٺ ٽائون کان بسم الله چوڪ لاسي ڳوٺ تائين احتجاجي ريلي ڪڍي مظاهرو ڪيو ويو. ريلي جي اڳواڻي سنڌ نيشنل پارٽي جي مرڪزي سينئر وائيس چئيرمين رمضان بليدي، نياز بليدي سردار لغاري جان محمد ڦلپوٽو. ڊي ايم خاصخيلي ۽ ٻين ڪئي. ريلي ۾ شريڪ ڪارڪنن ڌاري آبادڪاري خلاف سخت نعريبازي ڪئي. ان موقعي تي ريلي کي خطاب ڪندي رمضان بليدي. نياز بليدي ۽ ٻين چيو ته سنڌ اسان جو ھزارين سالن کان تاريخي وطن آھي، جنھن جا وارث صرف سنڌي آهن، سنڌ اندر پناهه وٺي ڪاروبار ڪندڙ افغان پناهگير سنڌ ۾ امن امان جي صورتحال کي خراب ڪرڻ جا ذميوار آهن. ھنن وڌيڪ چيو ته سنڌ ۾ ھن مھل چاليھ لک افغاني آباد ٿيل آھن جن کي سپريم ڪورٽ جي فيصلي موجب 30جون تي فوري طور سنڌ مان نيڪالي ڏني وڃي. ھنن وڌيڪ چيو ته غير ملڪي پناهگيرن جي نيڪالي لاءِ اردو ڳالهائيندڙن کي به آواز اٿارڻ گھرجي ھي افغان پناهگير اسان سڀني لاءِ نقصانڪار ثابت ٿين پيا. ھنن سپريم ڪورٽ. وفاقي حڪومت. سنڌ حڪومت کان افغانين. غير قانوني پرڏيھين کي فوري طور سنڌ مان نيڪالي جو مطالبو ڪيو آهي.