نامياري شاعره آپا مريم مجيدي لاڏاڻو ڪري وئي، سنڌ علمي ۽ ادبي دنيا سوڳوار بڻجي وئي

سجاول ( گلشيرميربحر ) نامياري شاعره آپا مريم مجيدي لاڏاڻو ڪري وئي، سنڌ علمي ۽ ادبي دنيا سوڳوار بڻجي وئي، خبر موجب سنڌ جي نامياري انقلابي شاعر محمد خان مجيدي جي نياڻي، ناليواري شاعره، ليکڪا، اديبه ۽ استاد مريم مجيدي لاڏاڻو ڪري وئي، جنهن جي خبر پکڙجڻ سان سڄي سنڌ جي علمي، ادبي، سماجي ۽ تعليمي حلقن ۾ ڏک ۽ سوڳ جي لهر پکڙجي وئي آهي آپا مريم مجيدي 80 ورهين جي ڄمار ۾ حيدرآباد جي هڪ نجي اسپتال ۾ وفات ڪري وئي۔ سندن مڙهه کي اباڻي شهر سجاول ۾ مٽي ماءُ حوالي ڪيو ويندو آپا مريم مجيدي سنڌ جي انهن چونڊ عورت اديبن ۽ شاعرائن مان هڪ هئي، جن پنهنجي علم، قلم ۽ فڪر ذريعي سنڌي ادب ۾ منفرد سڃاڻپ قائم ڪئي۔ هوءَ پنهنجي والد محمد خان مجيدي جي علمي ۽ فڪري ورثي جي سچي وارث هئي۔ سندس شاعريءَ ۾ سنڌ جي مٽيءَ جي خوشبو، عورتن جا احساس، قومي شعور، محبت، مزاحمت ۽ سماجي ناانصافين خلاف سگهارو آواز نمايان نظر ايندو هو سندس مشهور ڪتابن ۾ “سروم دکم دکم” ۽ “نيرانا ئي نيڻ” شامل آهن، جڏهن ته شاعريءَ جا تقريبن ڇهه ڪتاب شايع ٿي چڪا آهن ۽ وڌيڪ تصنيفون اڃا شايع ٿيڻيون آهن۔ ادبي خدمتن عيوض کيس ڪيترائي ادبي ايوارڊ پڻ مليا هئا تعليمي ماهر ۽ استاد جي حيثيت سان پڻ آپا مريم مجيدي جون خدمتون نمايان رهيون۔ هن پنهنجي زندگي سنڌ جي نياڻين کي تعليم جي زيور سان آراسته ڪرڻ ۽ شعور بيدار ڪرڻ لاءِ وقف ڪري ڇڏي هئي صوبائي وزير ثقافت ۽ سياحت سيد ذوالفقار علي شاه آپا مريم مجيدي جي وفات تي گهري ڏک ۽ افسوس جو اظهار ڪندي چيو آهي ته سندس علمي ۽ ادبي خدمتن کي هميشه ياد رکيو ويندو۔ هن مرحومه جي مغفرت ۽ بلند درجات لاءِ دعا پڻ گهري ۽ ڏکويل خاندان سان همدردي جو اظهار ڪيو قومي عوامي تحريڪ جي سربراهه اياز لطيف پليجو سابق ايم پي اي غلام قادر پليجو، سابق صوبائي وزير ۽ سينيٽر سسئي پليجو پنهنجي تعزيتي بيان ۾ چيو ته آپا مريم مجيدي جو وڇوڙو سنڌي ادب، شاعري ۽ مزاحمتي فڪر لاءِ وڏو نقصان آهي۔ هنن چيو ته آپا مريم وطن دوست، قوم دوست ۽ باوقار شخصيت هئي، جنهن سڄي عمر ادب ۽ علم جي خدمت ڪئي هوڏانهن سنڌي ادبي سنگت شاخ سجاول پاران آپا مريم مجيدي جي وڇوڙي تي هفتي سوڳ جو اعلان ڪيو ويو آهي۔ شاخ جي سيڪريٽري اصغر ميمڻ ۽ نوجوان شاعر اياز امر شيخ چيو ته مريم مجيدي پنهنجي شاعري ذريعي سنڌ، عورت، محبت، جدوجهد ۽ قومي شعور جهڙن موضوعن کي سگهاري انداز ۾ اجاگر ڪيو، جڏهن ته سندس وفات سان سنڌي ادب هڪ شعوري آواز کان محروم ٿي ويو آهي ٻئي طرف سنڌ ڪلچرل فورم جي باني چيئرمين صادق لاکو، وائيس چيئرمين محمد شريف جاکرو، سيڪريٽري جنرل لياقت علي سهتو ۽ ٻين اڳواڻن پاران پڻ گهري ڏک جو اظهار ڪندي سڄي سنڌ ۾ ٽن ڏينهن جي سوڳ جو اعلان ڪيو ويو آهي۔ اڳواڻن چيو ته آپا مريم مجيدي جديد سنڌي شاعريءَ جي نمائنده ۽ مزاحمتي لهجي واري شاعره هئي، جنهن پنهنجي شاعريءَ ۾ وقت جي ظالم قوتن، سماجي ناانصافين ۽ سنڌ دشمن روين خلاف بيباڪي سان لکيو ادبي، علمي، صحافتي ۽ سماجي حلقن جو چوڻ آهي ته آپا مريم مجيدي جو وڇوڙو سنڌي ادب ۽ تعليم لاءِ هڪ وڏو خال آهي، جيڪو ڊگهي عرصي تائين محسوس ڪيو ويندو، جڏهن ته “سنڌ جي لفظن جي دنيا اڄ سوڳوار آهي”۔