ملير: 2 عورتن سميت 5 منشيات فروش گرفتار، پوليس پاران 25 ڪلو چرس هٿ ڪرڻ جي دعويٰ

مرغي خاني پل ملير ندي ڀرسان ڪارروائي دوران ٻن عورتن سميت 5 منشيات فروشن کي گرفتار ڪيو: پوليس

ملير (رپورٽ: عبدالرشيد مورجھريو) شاهه لطيف پوليس ڳجهي اطلاع تي انٽيليجنس بيسڊ ڪارروائي ڪندي منشيات جي سپلاءِ ۽ وڪري ۾ ملوث مبينا نيٽ ورڪ کي ناڪام بڻائڻ جي دعوا ڪري 2 عورتن سميت 5 جوابدارن کي گرفتار ڪر۾ جي دعوا ڪئي آهي ۔ پوليس موجب ڪارروائي مرغي خاني پل ملير ندي ڀرسان ڪئي وئي، جتان 25 ڪلو 200 گرام اعليٰ معيار جي چرس ۽ موبائل فون هٿ ڪيا ويا، جن جي ماليت 50 لک رپين کان وڌيڪ ٻڌائي پئي وڃي۔ گرفتار جوابدارن ۾ شاڪر نويد، عبدالمنان، نويد خالق جڏهن ته عورت جوابدارن ۾ فضيله زال شاڪر نويد ۽ ناهد زال نويد خالق شامل آهن۔ پوليس موجب گرفتار ٿيل سڀئي پاڻ ۾ ويجها مائٽ آهن ۽ ٻنهي مردن سان گڏ عورتون سندن زالون آهن۔ شروعاتي جاچ دوران انڪشاف ٿيو آهي ته هٿ آيل منشيات ڪراچي جي پوش علائقن ۾ سپلاءِ ڪئي وڃڻي هئي، جڏهن ته منشيات جي وڪري لاءِ عورتن کي به استعمال ڪرڻ جو منصوبو هو۔ شاهه لطيف پوليس جو چوڻ آهي ته بروقت ڪارروائي ذريعي شهر ۾ سرگرم وڏي منشيات نيٽ ورڪ جون سرگرميون ناڪام بڻايون ويون آهن۔ پوليس گرفتار جوابدارن خلاف ڪيس داخل ڪري وڌيڪ جاچ شروع ڪري ڇڏي آهي، جڏهن ته نيٽ ورڪ جي ٻين سهولتڪارن جي ڳولا پڻ جاري آهي۔