قائدآباد پوليس پاران منشيات فروش عورت کي گرفتار ڪرڻ جي دعويٰ

نرگس عرف ملڪا کي 35 ڪلو 265 گرام اعليٰ ڪوالٽي جي چرس سميت گرفتار ڪيو: پوليس

ملير (رپورٽ: عبدالرشيد مورجھريو) قائدآباد پوليس ملير جي علائقي ۾ ڪارروائي ڪندي هڪ عورت منشيات فروش کي گرفتار ڪري وڏي مقدار ۾ اعليٰ ڪوالٽي چرس هٿ ڪرڻ جو دعويٰ ڪيو آهي.پوليس موجب هي ڪارروائي ڳجهي اطلاع تي انٽيليجنس بيسڊ آپريشن تحت خداداد قبرستان سواتي محلي ۾ ڪمبنگ ۽ سرچ آپريشن دوران ڪئي وئي، جتي ملزمه کي حراست ۾ ورتو ويو.گرفتار عورت جي سڃاڻپ نرگس عرف ملڪا زوجہ وڪيل طور ڪئي وئي آهي.پوليس مطابق جوابدار عورت جي قبضي مان 35 ڪلو 265 گرام اعليٰ ڪوالٽي چرس برآمد ڪئي وئي، جنهن جي ماليت تقريباً 60 لک رپين کان وڌيڪ ٻڌائي پئي وڃي. ان کان علاوه جڳهي جڳھ تان هڪ لک رپين کان وڌيڪ روڪ رقم به هٿ ڪئي وئي.ابتدائي جاچ موجب هٿ ٿيل منشيات ڪراچي جي مختلف علائقن سميت پوش علائقن ۾ سپلائي ۽ وڪري لاءِ تيار هئي. پوليس ذريعن جو چوڻ آهي ته گرفتار ملزمه هڪ وڏي نيٽ ورڪ جو حصو آهي، جنهن ۾ وڌيڪ ماڻهو به شامل آهن، جيڪي شهر جي مختلف علائقن ۾ منشيات جي سپلائي ۽ وڪري ۾ ملوث آهن. پوليس موجب هن نيٽ ورڪ کي ٽوڙڻ لاءِ وڌيڪ ڪارروائيون جاري آهن ۽ وڌيڪ گرفتارين لاءِ ڇاپا هنيا پيا وڃن.پوليس قائدآباد ٿاڻي ۾ ڪيس داخل ڪري وڌيڪ جاچ شروع ڪري ڇڏي آهي.