ملير: شاهه لطيف ٽائون ۽ ڀرپاسي وارن علائقن ۾ بجلي ۽ پاڻي جي بحران خلاف ڌرڻو

شهرين جو قومي شاهراهه تي ڌرڻو، ٽريفڪ معطل، گاڏين جون قطارون لڳي ويون

ملير (رپورٽ: عبدالرشيد مورجھريو) ملير ۾ شاهه لطيف ٽائون ۽ ڀرپاسي وارن علائقن ۾ بجلي جي ڊگهي لوڊشيڊنگ ۽ پاڻي جي شديد کوٽ خلاف شهرين وڏي انگ ۾ قومي شاهراهه تي نٽهڻ اس ۾ احتجاجي ڌرڻو هنيو، جنهن سبب ڪراچي کان ٺٽو ۽ ٻين علائقن ڏانهن ويندڙ ۽ ايندڙ ٽريفڪ مڪمل طور معطل ٿي وئي، جڏهن ته سوين گاڏيون روڊ تي ڦاسي پيون ۽ مسافر سخت پريشان ٿي ويا . احتجاج ڪندڙن جو چوڻ هو ته علائقي ۾ ڪيترن ئي ڏينهن کان بجلي جي اڻ اعلانيل لوڊشيڊنگ جاري آهي، جڏهن ته پاڻي جي فراهمي پڻ سخت متاثر ٿيل آهي، جنهن ڪري روزاني زندگي مفلوج بڻجي وئي آهي. هنن الزام هنيو ته سخت گرمي باوجود لاڳاپيل ادارا عوامي تڪليفن ڏانهن ڪوبه ڌيان نٿا ڏين ۽ شڪايتن باوجود مسئلا حل ناهن ڪيا پيا وڃن. شهرين احتجاج دوران انتظاميا ۽ لاڳاپيل ادارن خلاف سخت نعريبازي ڪندي مطالبو ڪيو ته فوري طور بجلي جي بندش ختم ڪري پاڻي جي فراهمي بحال ڪئي وڃي، ٻي صورت ۾ احتجاج جو دائرو وڌيڪ وڌايو ويندو. مظاهرين چيو ته گرمي جي شدت ۾ پاڻي ۽ بجلي کانسواءِ زندگي گذارڻ ناممڪن بڻجي ويو آهي، خاص طور عورتون، ٻار ۽ بزرگ سخت اذيت ۾ مبتلا آهن. احتجاج سبب قومي شاهراهه جي ٻنهي پاسن تي گاڏين جون ڊگهيون قطارون لڳي ويون، جڏهن ته مسافرن ۽ ٽرانسپورٽرن کي به شديد ڏکيائين کي منهن ڏيڻو پيو. اطلاع ملڻ تي پوليس ۽ انتظاميا جا عملدار واقعي واري هنڌ پهچي مظاهرين سان ڳالهيون ڪيون ۽ مسئلا حل ڪرائڻ جي خاطري تي احتجاج ختم ڪرائي روڊ کولرايو