سنڌي ادبي سنگت شاخ ملير طرفان مزاحمتي شاعر علي صفدر جي ياد ۾ تعزيتي گڏجاڻي

عوامي پريس ڪلب ۾ شاعر ۽ ليکڪ وحيد محسن جي صدارت هيٺ تعزيتي گڏجاڻي منعقد ڪئي وئي

ملير(رپورٽ: عبدالرشيد مورجھريو) سنڌي ادبي سنگت شاخ ملير طرفان جوانيءَ ۾ وڇڙي ويل مزاحمتي شاعر، ناول نگار ۽ حساس تخليقڪار علي صفدر جي ياد ۾ عوامي پريس ڪلب ملير ۾ شاعر ۽ ليکڪ وحيد محسن جي صدارت هيٺ تعزيتي گڏجاڻي منعقد ڪئي وئي، جنهن ۾ اديبن، شاعرن، صحافين ۽ ادب دوستن وڏي انگ ۾ شرڪت ڪئي. گڏجاڻي دوران علي صفدر جي ادبي، فڪري ۽ تخليقي خدمتن کي ڀرپور ڀيٽا پيش ڪئي وئي، گڏجاڻي جي ڪارروائي سيڪريٽري مجيب سنڌي هلائي. صدارتي خطاب ڪندي سنڌي ادبي سنگت ڪراچي شاخ جي جوائنٽ سيڪريٽري نامياري ليکڪ ۽ شاعر وحيد محسن چيو ته علي صفدر پنهنجي قلم وسيلي سچ، مزاحمت ۽ انسان دوستي جو پيغام عام ڪيو. هن چيو ته علي صفدر جي شخصيت انتهائي حساس، باوقار ۽ فڪر سان ڀرپور هئي، جنهن پنهنجي مختصر زندگيءَ ۾ اهڙو ادبي سرمايو ڇڏيو، جيڪو ايندڙ نسلن لاءِ رهنمائي جو ذريعو بڻيل رهندو، هن چيو ته علي صفدر جو وڇوڙو سنڌي ادب لاءِ وڏو نقصان آهي، خاص مهمان نامياري شاعر اقبال شاهين پنهنجي خطاب ۾ چيو ته علي صفدر انهن تخليقڪارن مان هو، جن ادب کي سماجي تبديليءَ جو وسيلو بڻايو، سندس شاعري ۽ نثر ۾ عام ماڻهوءَ جي درد، جدوجهد ۽ اميدن جي سچي عڪاسي ملي ٿي، هن چيو ته علي صفدر جي ادبي پورهئي کي محفوظ ڪري نئين نسل تائين پهچايو وڃي، ناليواري شاعر سيد غفور شاھ تقوي چيو ته علي صفدر صرف شاعر يا ناول نگار نه پر پنهنجي دور جو هڪ سگهارو مزاحمتي آواز هو، هن چيو ته مرحوم هر قسم جي ناانصافي خلاف قلم کنيو ۽ هميشه انسانيت، برابري ۽ حق جي ڳالهه ڪئي، سندس فڪر سدائين زنده رهندو، نوجوان شاعر ديوانو ديدار گاڏهي چيو ته علي صفدر جي شخصيت محبت، سادگي ۽ تخليقي سگهه جو حسين ميلاپ هئي، هن چيو ته سندس لکڻين ۾ ڌرتي، ماڻهن ۽ ثقافت سان بي پناھ محبت نظر اچي ٿي، جيڪا کيس ٻين کان منفرد بڻائي ٿي، سنڌي ادبي سنگت شاخ ملير جي سيڪريٽري مجيب سنڌي چيو ته علي صفدر سنڌي ادب جو اهڙو روشن باب آهي، جنهن کي وساري نٿو سگهجي، هن چيو ته علي صفدر پنهنجي تخليقن وسيلي نه رڳو ادبي دنيا ۾ سڃاڻپ ماڻي، پر سماج ۾ شعور، مزاحمت ۽ انساني قدرن کي پڻ هٿي ڏني، سندس ادبي پورهيو هميشه پڙهندڙن ۽ ادب دوستن جي يادگيرين ۾ زنده رهندو، خوبصورت شاعر مظهر حسين وريائي چيو ته تخليقڪار جسماني طور اسان کان وڇڙي سگهن ٿا، پر سندن لفظ، فڪر ۽ ادب هميشه زنده رهندا آهن، هن چيو ته علي صفدر جو ادبي ورثو نوجوان ليکڪن لاءِ اتساهه ۽ رهنمائي جو سرچشمو رهندو، تنهن ڪري سندس ڪم کي وڌيڪ اجاگر ڪرڻ جي ضرورت آهي، ان موقعي تي سنڌي ادبي سنگت شاخ ملير جي خزانچي عبدالخالق ڀٽي، علي صفدر جا غزل ڳائي کيس ڀيٽا پيش ڪئي، گڏجاڻي ۾ عبدالمجيد عاصم ابڙو، سامي ميمڻ، عبدالغفار عبد ميمڻ، قمبر ٻُٽ، عنايت علي شاهه، عبدالخالق ڀٽي، عتيق الرحمان، محمد احمد ڪورائي، پنهل پياسي، مختيار مگسي، سليمان شاھ، نور حسن چڻا، غلام ياسين سيلرو، اصغر مهرائي، جواد بلوچ، فياض علي، علي اصغر، وهاب گبول، اقبال ڪلمتي ۽ ٻين پڻ شرڪت ڪئي. گڏجاڻي جي پڄاڻي تي مرحوم علي صفدر جي مغفرت، سندس پونئرن لاءِ صبر جميل جي دعا ڪئي وئي، جڏهن ته ثقافت کاتي کان مطالبو ڪيو ويو ته علي صفدر جي ٻارڙن جي سارسنڀال ۽ هر ممڪن سهائتا لاءِ عملي قدم کنيا وڃن.