ملير: شاهه لطيف ٽائون ٿاڻي جي حد ۾ منشيات فروشي جو مبينا وڪرو جاري

ملير (رپورٽ: عبدالرشيد مورجھريو) شاهه لطيف ٽائون ٿاڻي جي قائدآباد، عبدالله ڳوٺ، رزاق آباد، شاهه لطيف ٽائون ۽ ٻين علائقن ۾ منشيات جي وڪري ۽ واھپي ۾ خطرناڪ حد تائين واڌ ٿي وئي آهي علائقي واسين موجب قائدآباد پل هيٺان مبينا طور هيروئن، پائوڊر، آفيم ۽ ٻيا منشيات کلي عام وڪرو ٿي رھي آھي جڏهن ته ڪيترائي ماڻهو سرعام نشو ڪندي پڻ نظر اچن ٿا علائقي واسين، واپارين ۽ دڪاندارن جو چوڻ آهي ته نشي جي عادي ماڻهن جي موجودگي سبب چورين، ڦرن ۽ ٻين ڏوهن ۾ اضافو ٿي رهيو آهي جنهن ڪري شهرين ۾ خوف ۽ هراس پکڙيل آهي ۽ ڪاروباري سرگرميون پڻ متاثر ٿي رهيون آهن شهرين سوال اٿاريو آهي ته پل هيٺ پوليس چوڪي موجود هجڻ باوجود منشيات فروشي جو سلسلو آخر ڇو جاري آهي ذريعن موجب ڪجهه انٽرنيٽ ڪيفين ۽ ٻين هنڌن تي پڻ مبينا طور نشي آور شيون آساني سان ملي رھيون آهن علائقي واسين ايس ايڇ او شاهه لطيف ٽائون ايس ايس پي ملير ۽ اعليٰ پوليس اختيارين کان مطالبو ڪيو آهي ته منشيات فروشن، سندن سهولتڪارن ۽ ڏوهارين خلاف بنا فرق جي فوري ڪارروائي ڪري منشيات جي اڏن جو خاتمو ڪيو وڃي، جيئن نوجوان نسل کي هن لعنت کان بچائي سگهجي..