اقليتي برادري جي شاگردن ۾ اسڪالرشپ جا چيڪ ورهائڻ واري تقريب منعقد

تقريب جي صدارت ايم پي اي ۽ وڏي وزير جي خاص معاون ڊاڪٽر شام سندر آڏواڻي ڪئي

عمرڪوٽ/ڪراچي ( ڊ ، ر ) چيئرمين پاڪستان پيپلز پارٽي بلاول ڀٽو زرداري جي ويزن ۽ وڏي وزير سنڌ سيد مراد علي شاهه جي هدايتن موجب اقليتي برادري جي شاگردن جي تعليمي سهائتا لاءِ اسڪالرشپ چيڪ ورهائڻ جي تقريب منعقد ڪئي وئي، تقريب جي صدارت سنڌ اسيمبلي جي ميمبر ۽ وڏي وزير سنڌ جي خاص معاون براءِ اقليتي امور ڊاڪٽر شام سندر آڏواڻي ڪئي، محڪمه اقليتي امور حڪومت سنڌ پاران منعقد ڪيل تقريب ۾ اقليتي شاگردن ۽ شاگردياڻين کي اسڪالرشپ جا چيڪ ڏنا ويا، ان موقعي تي وڏي وزير سنڌ جي خاص معاون براءِ انساني حقن راجوير سنگهه سوڍا، ايم پي اي انيل ڪمار رتناڻي، سيڪريٽري اقليتي امور جمشيد عالم ميمڻ، ايڊيشنل سيڪريٽري محمد اسلم کوسو، ڊائريڪٽر عمران الحسن خواجه سميت ٻين اعليٰ عملدارن شرڪت ڪئي، تقريب کي خطاب ڪندي ڊاڪٽر شام سندر آڏواڻي چيو ته پاڪستان پيپلز پارٽي هميشه اقليتن جي حقن، تعليم ۽ خوشحالي لاءِ عملي قدم کنيا آهن، هن چيو ته تعليم ئي ترقي ۽ روشن مستقبل جي ضمانت آهي، تنهنڪري اقليتي شاگردن کي بهتر تعليمي موقعا فراهم ڪرڻ حڪومت جي اولين ترجيحن ۾ شامل آهي، ان موقعي تي مهمانن شاگردن ۽ شاگردياڻين کي اسڪالرشپ چيڪ ورهائي سندن تعليمي ڪاميابين کي ساراهيو ۽ سندن روشن مستقبل لاءِ نيڪ خواهشن جو اظهار ڪيو.