عوامي پريس ڪلب ملير پاران ماھيگير اڳواڻ عبدالمجيد موٽاڻي جي مان ۾ تقريب منعقد

عبدالمجيد موٽاڻي ماھيگير برادري جي حقن لاءِ جدوجهد ڪندڙ اهم اڳواڻ آهي: خدا ڏنو شاهه/ فاطمه مجيد

ملير (عبدالرشيد مورجھريو) عوامي پريس ڪلب ملير طرفان سينيئر ماھيگير اڳواڻ عبدالمجيد موٽاڻي جي مان ۾ “هڪ شام عبدالمجيد موٽاڻي جي نانءُ” جي عنوان سان شاندار تقريب ڪوٺائي ويئي، جنهن ۾ سياسي، سماجي اڳواڻن، علائقي جي معززن، سامونڊي آبادين جي ماڻهن ۽ ملير جي مختلف علائقن مان سوين ماڻهن وڏي تعداد ۾ شرڪت ڪئي.تقريب دوران پريس ڪلب طرفان عبدالمجيد موٽاڻي کي گلن جا هار پارايا ويا،اجرڪون پيش ڪيون ويون ۽ سندن سامونڊي خدمتن ۽ ماھيگير برادري جي حقن لاءِ جدوجهد کي ساراهيندي لائيف ٽائيم اچيومنٽ ايوارڊ پڻ ڏنو ويو ان موقعي تي سياسي، سماجي اڳواڻ سيد خدا ڏنو شاھ چيو ته عبدالمجيد موٽاڻي ماھيگير برادري جي حقن لاءِ جدوجهد ڪندڙ اهم اڳواڻ آهي. هن چيو ته مجيد موٽاڻي سمنڊ سان جڙيل ماڻهن جي مسئلن کي اجاگر ڪري کين آواز ڏنو، جيڪو قابلِ تعريف عمل آهي. فشرمين ڪوآپريٽو سوسائٽي جي چيئرپرسن فاطمه مجيد چيو ته عبدالمجيد موٽاڻي پنهنجي سموري زندگي ماھيگيرن جي حقن جي جدوجهد لاءِ وقف ڪري ڇڏي آهي عالمي سطح تي به هن ماھيگيرن جي مسئلن کي اجاگر ڪرڻ لاءِ مختلف ملڪن جا دورا ڪيا.ابراهيم حيدري ٽائون جي چيئرمين نذير ڀٽو چيو ته عبدالمجيد موٽاڻي ابراهيم حيدري ۽ ملير جي سڃاڻپ بڻجي ويو آهي. هن چيو ته موٽاڻي وٽ سمنڊ بابت وسيع ڄاڻ آهي ۽ هو سامونڊي زندگي جو وڏو ماهر آهي. سماجي اڳواڻ يونس خاصخيلي چيو ته عبدالمجيد موٽاڻي جي زندگي جدوجهد ۽ عوامي خدمت سان ڀرپور آهي. هن چيو ته ماھيگيرن سان ٿيندڙ ناانصافين خلاف سندن آواز هميشه مضبوط رهيو آهي.سماجي اڳواڻ غلام نبي مگسي چيو ته عبدالمجيد موٽاڻي رڳو هڪ فرد نه پر هڪ تحريڪ جو نالو آهي. هن چيو ته موٽاڻي ماھيگير برادري کي منظم ڪري سندن حقن لاءِ آواز بلند ڪيو.عوامي پريس ڪلب ملير جي صدر سجاد علي شاه چيو ته پريس ڪلب طرفان هي تقريب اهڙن ماڻهن جي خدمتن کي مڃتا ڏيڻ لاءِ منعقد ڪئي وئي آهي، جيڪي سماج جي بهتري لاءِ خاموشي سان ڪم ڪندا آهن. هن چيو ته عبدالمجيد موٽاڻي سمنڊ ۽ ماھيگيرن جي تاريخ جو اهم باب آهن.صحافي سامي ميمڻ چيو ته عبدالمجيد موٽاڻي جي زندگي جدوجهد، علم ۽ سماجي خدمت جو روشن مثال آهي. هن چيو ته سندن سامونڊي ڄاڻ ايتري وسيع آهي جو يونيورسٽين جا شاگرد ۽ پروفيسر به سندن تجربن مان سکڻ لاءِ ساڻن رابطو ڪندا آهن.عبدالمجيد موٽاڻي تقريب کي خطاب ڪندي سينيئر ماھيگير اڳواڻ عبدالمجيد موٽاڻي چيو ته هو سڄي زندگي سمنڊ ۽ ماھيگير برادري سان جڙيل رهيو آهي ۽ سندن حقن لاءِ جدوجهد جاري رکندو. هن چيو ته ماھيگيرن کي ڪيترن ئي مسئلن کي منهن ڏيڻو پوي ٿو، پر گڏيل جدوجهد سان انهن مسئلن جو حل ممڪن آهي.هن چيو ته جڏهن ماھيگيرن سان ناانصافيون وڌيون ته هن سندن حقن لاءِ آواز بلند ڪيو ۽ تنظيمون قائم ڪري جدوجهد جو آغاز ڪيو. هن وڌيڪ چيو ته ماھيگير برادري جي مسئلن کي عالمي سطح تي اجاگر ڪرڻ لاءِ هن مختلف ملڪن جا دورا به ڪيا.عبدالمجيد موٽاڻي چيو ته سندس رسمي تعليم محدود آهي، پر سمنڊ سان وابستگي کيس اهڙو تجربو ڏنو آهي جو تعليمي ادارن جا شاگرد ۽ استاد به سامونڊي ڄاڻ حاصل ڪرڻ لاءِ ساڻس رابطو ڪندا آهن.هن تقريب جي انعقاد ۽ اعزاز ڏيڻ تي عوامي پريس ڪلب ملير، مهمانن ۽ شرڪت ڪندڙن جو ٿورائتو پڻ ظاهر ڪيو.