ڪنري ۾ فصلن جي واڌ ويجھ، سنڀال ۽ بهتر پيداوار حاصل ڪرڻ لاءِ سيمينار منعقد

سيمينار ۾ ماهرن مفيد صلاحون ڏنيون، ترقي پسند آبادگارن ڀرپور شرڪت ڪري هن قدم کي ساراهيو

عمرڪوٽ(رپورٽ:ڪانجي مل رکيسر)ڪنري زرعي ڀاڻ ٺاهيندڙ ڪمپني پاران فصلن جي واڌ ويجھ، سنڀال ۽ بهتر پيداوار حاصل ڪرڻ لاءِ هڪ سيمينار منعقد ڪيو ويو، جنهن ۾ زرعي ماهرن مفيد صلاحون ڏنيون، جڏهن ته ترقي پسند آبادگارن ڀرپور شرڪت ڪري هن قدم کي ساراهيو. تفصيل موجب سرسبز ڀاڻ ٺاهيندڙ فاطمه فرٽيلائزرز ڪمپني ۽ ايگريڪلچر ايڪسٽينشن ڊپارٽمينٽ عمرڪوٽ پاران مقامي هال ۾ ڪپهه ۽ مرچ جي منافعي بخش پوک بابت هڪ سيمينار منعقد ڪيو ويو. سيمينار ۾ اياز محمود ورک ٽيڪنيڪل سروسز آفيسر ميرپورخاص (فاطمه گروپ)، کيتا اوماني ڊسٽرڪٽ سيلز مينيجر ڊگري (فاطمه گروپ)، عماد آرائين ڊپٽي ڊائريڪٽر ڪنري ايگريڪلچر ايڪسٽينشن ڊپارٽمينٽ، حيات رند ايگريڪلچر آفيسر ڪنري، ميان سليم آرائين، يوسي چيئرمين رضا حميد، شعيب طاهر سميت وڏي انگ ۾ ترقي پسند آبادگارن شرڪت ڪئي. ان موقعي تي زرعي ماهرن آبادگارن کي خطاب ڪندي چيو ته علائقي ۾ ڪپهه ۽ مرچ جي فصل جي پيداوار تمام گهٽ آهي. پيداوار ۾ واڌ لاءِ مختلف صلاحون ڏيندي ٻڌايو ويو ته وڌيڪ پيداوار حاصل ڪرڻ لاءِ سرسبز نائيٽروفاس، سرسبز ڪين ۽ پاڪ عرب ڪين جو استعمال ضروري آهي. انهن ڀاڻن جي استعمال سان ڪپهه ۽ مرچ جي فصل ۾ 10 سيڪڙو کان وڌيڪ پيداوار وڌائي سگهجي ٿي. آخر ۾ آبادگارن سيمينار جي انعقاد کي ساراهيندي اهڙن پروگرامن کي جاري رکڻ جو مطالبو ڪيو.