يو سي پپري، گڏاپ ٽائون ۾ سيوريج نظام تباهه، رهواسي سخت پريشان

ملير(رپورٽ :عبدالرشيد مورجھريو)گڏاپ ٽائون جي يونين ڪائونسل پپري ۾ سيوريج جو نظام مڪمل طور تباهه ٿي ويو آهي، گٽر لائينون ٽٽڻ سبب گندو پاڻي گهٽين ۽ رستن تي بيهي تلائن جي صورت اختيار ڪري ويو آهي، جنهن ڪري علائقي واسين جي زندگي عذاب بڻجي وئي آهي.رهواسين موجب ڪافي عرصي کان سيوريج جو مسئلو برقرار آهي، پر لاڳاپيل انتظاميه طرفان ڪو به سنجيده قدم نه کنيو ويو آهي. گهٽين ۾ بيٺل گندي پاڻي سبب ٻارن، عورتن ۽ بزرگن کي اچ وڃ ۾ سخت تڪليفن کي منهن ڏيڻو پئجي رهيو آهي، جڏهن ته بيمارين پکڙجڻ جا خدشا پڻ وڌي ويا آهن.انجمن تاجران پپري بن قاسم، سياسي ۽ سماجي تنظيمن ۽ وڪيل برادري پاران ڪيترائي ڀيرا احتجاج ڪيا ويا، لاڳاپيل اختيارين کي درخواستون ڏنيون ويون ۽ عدالتن سان پڻ رجوع ڪيو ويو، پر افسوس جو هن مسئلي جو ڪو حل نه نڪتو آهي. احتجاج ڪندڙن جو چوڻ آهي ته بار بار آواز اٿارڻ باوجود انتظاميه خاموش تماشائي بڻيل آهي.رهواسين سوال اٿاريو آهي ته آخر يو سي پپري ۽ گڊاپ ٽائون جو بجيٽ ڪٿي خرچ ٿي رهيو آهي، جڏهن ته علائقي ۾ بنيادي سهولتون به مهيا نه ٿي رهيون آهن. علائقي واسين اختيارين کان مطالبو ڪيو آهي ته فوري طور سيوريج نظام بحال ڪيو وڃي، گٽر لائينن جي مرمت ڪئي وڃي ۽ ذميوار عملدارن خلاف ڪارروائي ڪئي وڃي، ٻي صورت ۾ احتجاج جو دائرو وڌايو ويندو.