بدين جي قديمي ڳوٺ چيتن لال ڀيل کي ڊاهڻ خلاف ملير ۾ احتجاج

ڳوٺ چيتن لال ڀيل بدين جو هڪ قديم ڳوٺ آهي، جتي ورهين کان آباد آهيون: ڳوٺاڻا

ملير (رپورٽ: عبدالرشيد مورجھريو) بدين ضلعي جي قديم ڳوٺ چيتن لال ڀيل کي ڊاهڻ خلاف متاثر ڳوٺاڻن رزاق مک چوک کان احتجاجي ريلي ڪڍي عوامي پريس ڪلب ملير اڳيان ڌرڻو هنيو احتجاجي مظاهري جي اڳواڻي ھيرداس ڀيل، اشوڪ ڪمار، درشن لال، جيئي سنڌ محاذ اڳواڻ فيض سنڌي، جدوجهد ڪميٽي جو اڳواڻ اقبال ڪلمتي ۽ ٻيا ڪري رهيا ھئا.مظاهرين هٿن ۾ بينر ۽ پلي ڪارڊ کڻي ڳوٺ ڊاهڻ بند ڪيو، چيتن لال ڀيل جي ڳوٺاڻن سان انصاف ڪيو ۽ بااثرن خلاف ڪارروائي ڪيو” جا اڀ ڏاريندڙ نعرا هڻي رهيا هئا اڳواڻن ميڊيا سان ڳالهائيندي چيو ته ڳوٺ چيتن لال ڀيل بدين جو هڪ قديم ڳوٺ آهي، جتي هو ڪيترن ئي سالن کان آباد آهن، پر بااثر معشوق نھڙيو ۽ ٻيا زبردستي قبضو ڪري سندن گهر ڊاهي پٽ ڪري ڇڏيا آهن. هنن چيو ته عورتون، ٻار ۽ بزرگ کليل آسمان هيٺ بي يار و مددگار ويٺا آهن، جڏهن ته سندن مال متاع به تباهه ڪيو ويو آهي. هنن وڌيڪ چيو ته هن عمل سان نه رڳو سندن اجھا کسيا ويا آهن پر سندن روزگار ۽ زندگي به خطري ۾ پئجي وئي آهي.مظاهرين الزام لڳايو ته مقامي انتظاميا ۽ لاڳاپيل ادارا شڪايتن باوجود ڪو به اثرائتو قدم کڻڻ ۾ ناڪام رهيا آهن، جنهن ڪري ڄاڻايل بااثرن مارو ماڻھن لاءِ رڻ ٻاري ڏنو آهي احتجاج ڪندڙن سنڌ جي وڏي وزير، چيف سيڪريٽري، آءِ جي سنڌ ۽ ٻين اعليٰ اختيارين کان مطالبو ڪيو ته واقعي جو فوري نوٽيس وٺي ڳوٺ چيتن لال ڀيل تي ٿيل قبضي کي ختم ڪرايو وڃي، متاثر ڳوٺاڻن کي تحفظ فراهم ڪيو وڃي، ڊاهيل گهرن جو ازالو ڪيو وڃي ۽ ملوث بااثر ماڻهن خلاف سخت قانوني ڪارروائي ڪئي وڃي. هنن خبردار ڪيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو سڄي سنڌ تائين وڌايو ويندو.