ملير، شاهه لطيف ٽائون ۾ گٽر اٿلي پيا، ڪچري جا به ڍير لڳل، پيئڻ جي پاڻي ۾ گٽر جو پاڻي شامل ٿيڻ سبب علائقي واسي پريشان

مختلف گهٽين ۽ پاڙن ۾ گٽر جو پاڻي ڪيترن ڏينهن کان بيٺل

ملير (رپورٽ: عبدالرشيد مورجھريو) ابراهيم حيدري ٽائون جي يونين ڪائونسل شاهه لطيف ٽائون ۾ انتظاميا جي مبينا غفلت ۽ نااهلي سبب صفائي ۽ نيڪال جو نظام مڪمل طور مفلوج ٿي ويو آهي، جتي گذريل ٻن هفتن کان گٽرن اٿلڻ ۽ ڪچري جي ڍيرن علائقي واسين جي زندگي عذاب بڻائي ڇڏي آهي، جڏهن ته گٽر جو گندو پاڻي پيئڻ جي پاڻي جي لائينن ۾ شامل ٿيڻ سبب صحت جو بحران پيدا ٿي ويو آهي۔علائقي واسين موجب شاهه لطيف ٽائون جي مختلف گهٽين ۽ پاڙن ۾ گٽر جو پاڻي ڪيترن ڏينهن کان بيٺل آهن، جنهن سبب روڊ ۽ گهٽيون گندي پاڻي هيٺ اچي ويون آهن۔ بدبودار پاڻي گهرن اندر داخل ٿيڻ لڳو آهي، جڏهن ته ڪيترن هنڌن تي سيوريج جو پاڻي صاف پيئڻ واري پاڻي جي لائينن ۾ شامل ٿي ويو آهي، جنهن ڪري رهواسي گٽر مليل پاڻي پيئڻ تي مجبور ٿي ويا آهن۔ رهواسين جو چوڻ آهي ته گذريل ٻن هفتن دوران ابراهيم حيدري ٽائون ۽ يوسي شاهه لطيف ٽائون جي چيئرمين کي بار بار شڪايتون ڪيون ويون، لکت ۾ درخواستون ڏنيون ويون ۽ فون ذريعي پڻ آگاهه ڪيو ويو، پر اڃا تائين ڪو به عملي قدم نه کنيو ويو آهي، جنهن سبب صورتحال وڌيڪ خراب ٿيندي پئي وڃي۔ علائقي واسين ٻڌايو ته مختلف هنڌن تي ڪچري جا ڍير پڻ لڳي ويا آهن، جن مان بدبو پکڙجي رهي آهي ۽ مڇرن ۽ مکين جي واڌ وڌي وئي آهي، جنهن سبب ڊينگي، مليريا، گيسٽرو ۽ ٻين وبائي بيمارين پکڙجڻ جو خدشو وڌي ويو آهي۔ ٻارن، بزرگن ۽ عورتن کي سخت تڪليفن کي منهن ڏيڻو پئجي رهيو آهي، جڏهن ته ڪيترائي ماڻهو اڳ ئي پيٽ ۽ چمڙي جي بيمارين ۾ مبتلا ٿي چڪا آهن۔ علائقي واسين سخت ڪاوڙ جو اظهار ڪندي چيو ته ٽائون ۽ يوسي انتظاميا صرف دعوائن تائين محدود آهي، جڏهن ته عملي طور ڪو به قدم نه کنيو پيو وڃي رهواسين خبردار ڪيو آهي ته جيڪڏهن فوري طور گٽر جي پاڻي جي نيڪال، صفائي سٿرائي ۽ ڪچري جي ڍيرن کي نه هٽايو ويو ته هو احتجاج تي مجبور ٿيندا۔ علائقي واسين ڪمشنر ڪراچي، ڊپٽي ڪمشنر ملير، واٽر اينڊ سيوريج ڪارپوريشن ۽ ٻين لاڳاپيل اختيارين کان فوري نوٽيس وٺڻ جو مطالبو ڪندي چيو آهي ته انساني جانين کي لاحق خطري کي سنجيدگي سان ورتو وڃي ۽ هنگامي بنيادن تي نيڪال آب ۽ صفائي جا قدم کنيا وڃن۔