ڪراچيءَ کان لاهور ويندڙ رحمان بابا ٽرين جي انجڻ کي باهه

ملير (رپورٽ: عبدالرشيد مورجھريو) ڪراچي کان لاهور ويندڙ رحمان بابا ايڪسپريس جي انجڻ کي اوچتو باهه لڳڻ سبب مسافرن ۾ ڏهڪاءُ پکڙجي ويو، جڏهن ته بروقت ڪارروائي سبب ڪو جاني نقصان نه ٿيو.ذريعن موجب رحمان بابا ٽرين جڏهن گھگھر فاٽڪ ڪراس ڪيو ته اوچتو انجڻ مان دونھون نڪرڻ شروع ٿيو، جنهن کانپوءِ ٿوري ئي دير ۾ انجڻ کي باهه لڳي وئي. باهه لڳڻ بعد ٽرين کي فوري طور روڪيو ويو ۽ مسافرن کي احتياط طور بوگين مان هيٺ لاهيو ويو.اکين ڏٺن شاهدن موجب باهه لڳڻ سان مسافرن ۾ خوف ۽ هراس پکڙجي ويو،ڪيترائي مسافر بوگين مان نڪري کليل ميدان ڏانهن ڊوڙي ويا. ڪجهه دير لاءِ علائقي ۾ افراتفري واري صورتحال پيدا ٿي وئي، جڏهن ته ٽرين عملي فوري طور تي ايمرجنسي قدم کنيا. ريلوي ذريعن موجب باهه لڳڻ جو سبب انجڻ ۾ فني خرابي قرار ڏنو پيو وڃي. باهه سبب انجڻ کي سخت نقصان پهتو ۽ انجڻ جو وڏو حصو سڙي ويو، جڏهن ته ٽرين جي ٻين بوگين کي ڪو نقصان نه پهتو.واقعي جي اطلاع ملڻ بعد ريلوي عملي ۽ امدادي ٽيمون موقعي تي پهتيون ۽ باهه تي ضابطو آندو ويو. اختيارين موجب واقعي ۾ ڪنهن به مسافر يا عملي کي جاني نقصان نه ٿيو، جيڪو هڪ وڏي حادثي کان بچاءُ قرار ڏنو پيو وڃي.ريلوي اختيارين واقعي جي جاچ شروع ڪري ڇڏي آهي، جڏهن ته متاثر ٽرين جي مسافرن کي متبادل انتظامن ذريعي سندن منزل ڏانهن روانو ڪرڻ جون ڪوششون ڪيون پيون وڃن.مسافرن ريلوي اختيارين کان مطالبو ڪيو آهي ته ٽرينن جي فني حالت کي بهتر بڻايو وڃي ته جيئن مستقبل ۾ اهڙن واقعن کان بچي سگهجي.