ڀارتي جيلن ۾ قيد مهاڻن جون تصويرون وارثن تائين پهچي ويون ، صدمي ۾ هڪ قيدي جي امڙ فوت

قيدي مهاڻي ناکو محمد حسين جي امڙ تصوير ڏسندي ئي دل جو دورو پوڻ سبب فوت ٿي وئي

ملير (رپورٽ: عبدالرشيد مورجھريو) ڀارتي جيلن ۾ قيد پاڪستاني مهاڻن جون تصويرون ۽ لسٽون آخرڪار سندن گهرڀاتين تائين پهچي ويون، جنهن کانپوءِ علائقي ۾ جذباتي منظر ڏسڻ ۾ آيا، جڏهن ته خوشي جي هن موقعي تي هڪ افسوسناڪ واقعو به پيش آيو، جتي قيدي مهاڻي ناکو محمد حسن جي امڙ لسٽ ڏسڻ بعد دل جو دورو پوڻ سبب فوت ٿي وئي.ذريعن موجب 4 مهينا اڳ پاڪستان جي سامونڊي حدن مان گرفتار ڪيل 11 مهاڻن جون ڪجهه ڏينهن اڳ ڀارت مان لسٽون ۽ تصويرون جاري ڪيون ويون هيون، جن کي ڏسڻ کانپوءِ قيدي مهاڻي ناکو محمد حسن جي امڙ سخت صدمي ۾ اچي وئي. گهرڀاتين موجب لسٽ ڏسڻ کانپوءِ کيس اوچتو دل جو اٽيڪ ٿيو، جنهن سبب هوءَ موقعي تي ئي فوت ٿي وئي.اطلاعن موجب تصويرن ۾ شامل 11 مهاڻن جو تعلق ابراهيم حيدري سان آهي، جڏهن ته وڌيڪ 9 مهاڻا علي اڪبر شاهه ڳوٺ جا رهواسي آهن. اهي تصويرون متاثر خاندانن طرفان فراهم ڪيون ويون آهن.گهرڀاتين تصويرون ڏسي هڪ طرف سک جو ساهه کنيو ته سندن پيارا زنده آهن، جڏهن ته ٻي طرف سندن آزادي لاءِ سخت بيچيني به ظاهر ڪئي وئي. متاثر خاندانن پاڪستان حڪومت کان مطالبو ڪيو آهي ته ڀارت سان سفارتي سطح تي فوري رابطو ڪري مهاڻن جي جلد آزادي کي يقيني بڻايو وڃي.واضح رهي ته سامونڊي حدن جي مبينا ڀڃڪڙي جي الزام هيٺ ڪيترائي پاڪستاني مهاڻا سالن کان ڀارتي جيلن ۾ قيد آهن، جڏهن ته سندن گهرڀاتي ڊگهي عرصي کان سندن آزادي لاءِ اپيلون ڪندا پيا اچن.علائقي واسين ۽ مهاڻا برادري انساني همدردي جي بنياد تي قيد پاڪستاني مهاڻن جي فوري آزادي جو مطالبو ڪيو آهي ته جيئن اهي جلد پنهنجي گهرڀاتين سان ملي سگهن.